Kryeministri Edi Rama mbajti një fjalim në hapje të Samitit të IV të Diasporës që po zhvillohet këtë të martë, 14 prill, në Tiranë, duke vënë theksin te roli kyç i shqiptarëve jashtë vendit në të ardhmen e Shqipërisë.
Në fjalën e tij, Rama e cilësoi një privilegj të veçantë praninë përpara diasporës, jo vetëm si kryeministër, por edhe si pjesë e një komuniteti më të gjerë kombëtar. Ai theksoi se Shqipëria nuk kufizohet nga territori i saj, por shtrihet kudo ku shqiptarët ruajnë gjuhën dhe shpresën.
“Të nderuar zonja dhe zotërinj, të dashur vëllezër dhe motra të diasporës shqiptare, është privilegj i veçantë të jem sot këtu përpara jush si kryeministër i Shqipërisë, por edhe si një zë mes shumë zërash që formojnë bashkësinë e një kombi. Shqipëria nuk mbaron aty ku mbaron territori i saj, por kudo ku shqiptarët mbajnë gjuhën dhe shpresën. Sot kur bota është më e ndërlidhur se kurrë dhe kur fjala si kurrë më parë, ju jeni zgjatimi i gjallë i Shqipërisë kudo në botë.”, tha Rama.
Kryeministri mes të tjerash theksoi se Samiti i Diasporës nuk është një aktivitet ceremonial, por një platformë me objektiva të qarta dhe të përbashkëta.
“Diaspora nuk është në periferi të jetës kombëtare të Shqipërisë por në qendër të saj“, shtoi më tej ai.
Rama u shpreh se Shqipëria nuk kërkon më nga diaspora vetëm lidhje emocionale apo të ardhura nga reminitancat, por angazhim konkret në investime, inovacion, jetën akademike dhe në ndërtimin e së ardhmes së vendit.
Duke folur për zhvillimin e vendit, ai përdori metaforën e një “kantieri ndërtimi për Shqipërinë 2030”.
“Si në çdo kantier, edhe në atë të Shqipërisë 2030 ka pluhur, ka zhurmë, madje zhurmë zhurdhuese. Por ndonjëherë është mirë të kthesh kokën pas, për forcë, frymëzim për të filluar punën që kemi nisur. Për t’u ndjerë më të fortë përballë tatëpjetës së thepisur që duhej të ngjisnim drejt majës për të cilën sot jemi më afër se kurrë ndonjëherë. Sot jemi në fazën e ndërtimit të asaj që ka qenë boshti i bisedës tonë shekullore.”, tha Rama.
Kreu i qeverisë këtu kujtoi edhe një nga kërkesat historike të diasporës, votën jashtë atdheut, e cila sipas tij ishte një kërkesë e përsëritur në samitet e mëparshme. Ai theksoi se sot kjo e drejtë është bërë realitet, pasi diaspora ka mundur ta ushtrojë atë në zgjedhjet e fundit, duke kaluar nga një kërkesë në një të drejtë konkrete të zbatuar.
