Nuk mund të kemi arsim cilësor në kushtet e nën-financimit publik. Kjo tezë është pranuar edhe nga qeveria, e gjetur edhe nën presionin e protestave.
Ndaj Ministria e Arsimit do të ketë më shumë para në dispozicion vitin e ardhshëm. Nga 65.2 miliard lekë këtë vit, fondi për edukimin dhe sportin rritet në mbi 67 miliardë gjatë 2027-s.
“Kemi një nivel shumë të lehtë me 0.1 apo po themi dhe 1% të GDP jemi larg qenies së standardit dhe qenies së cilësisë së sistemit të arsimit për atë që kërkohet. Fatkeqësisht qeveria është ende në fazën që nuk e sheh si prioritet arsimin”, tha Nora Malaj, ish-zëvendësministre e Arsimit dhe Shkencës.
Arsimi bazë, ku përfshihet edhe parashkollori do të marrë pjesën më të madhe të parave, mbi 34 miliardë lekë, ndjekur nga arsimi universitar dhe ai i mesëm. Pjesa tjetër e parave shkon për shkencën dhe zhvillimin e sportit.
“Nuk po studiohet realisht se cila është harta e prioriteteve problematike që ka arsimi dhe si mund të përkthehet në buxhet që do të thotë për çfarë mësuesish kemi nevojë çfarë kualifikimi. Njëkohësisht po të shohim fashën e arsimin të lartë jemi në kuadër të rritjes së investimeve në drejtim të bërjes së projekteve, por realisht kërkimi shkencor është shumë larg asaj që kërkohet”, u shpreh Malaj.
“Duhen veçanërisht më shumë para për kërkimin shkencor, jo për të bërë shkencë, por për të bërë studime dhe për të kuptuar se ku jemi dhe çfarë duhet të bëjmë”, theksoi Qemal Çejku, ekspert i arsimit.
Me gjithë rritjen, buxheti për arsimin vitin e ardhshëm do të jetë sa më pak se 2.6 për qind e Prodhimit të Brendshëm Bruto i cili për 2027-n parashikohet të arrijë në mbi 2.6 trilionë lekë.
“Nëse nuk do të investojmë 5 për qind të PBB në arsim, ne asnjëherë nuk do të kemi rezultate në drejtim të arsimit dhe shkencës”, thekson Çejku.
Shqipëria është vendi me nivelin më të ulët të shpenzimeve për arsimin në raport me Prodhimin e Brendshëm Bruto në rajon. Kosova kryeson me 4.6 për qind të Prodhimit të Brendshëm Bruto, ndjekur nga Mali i Zi, Maqedonia e Veriut dhe Serbia. /A2CNN/
