Kryeministri Edi Rama ishte sot në Malësinë e Madhe në vijim të turit të tij elektoral, ku prezantoi kandidaten e ASHE-së në këtë bashki Tonin Marinaj. Në fjalën e tij kryeministri ftoi banorët të zgjedhin drejtimin e duhur për t’i dhënë zonës zhvillimin e merituar dhe të munguar ndër vite.
Por siç është bërë tashmë e zakonshme shefi i qeverisë, ka përdorur edhe krahasimet dhe batutat në këtë fushatë elektorale. Për kryeministrin Rama, Partia Demokratike është si një trup cirku. Ndërsa mazhoranca tha ai ngjan me atë reklamën “ne nuk jemi më të mirët, por më të mirë se ne nuk ka”.
“Kemi projekte për zhvillimin e këtyre zonave. Ne jemi si ajo reklama: Ne nuk jemi më të mirët, por më të mirë se ne nuk ka. Nga krahu tjetër është një trupë cirku që shkon nëpër Shqipëri duke treguar përralla nga më të ndryshme. A thua se dritat do jenë qyl, taksat do hiqen, apo kështu me radhë. PD nuk flet fare për problemet me të cilat merret bashkia, po flasin për këto të tjerat.
PD është në drejtim të paditur, sa nuk e ka shansin të tallet me vetveten, kujton se do gjejë nëpër Shqipëri budallenj që të dëgjojnë një përrallë me të cilët qytetarët u ndanë në zgjedhjet e qershorit 2013. Prandaj ju ftoj që më 21 Qershor të votoni për drejtimin e duhur”, tha kryeministri Rama.
Rama përsëriti thirrjen se ata banorë që janë demokratë “Saliun të mbajnë për mbret, por për shërbëtor të zgjedhin Tonin”.
