Kryeministri Edi Rama është takuar në New York me kryetarin e Bashkisë, Bill De Blasio. Rama ka shprehur falënderimet për pritjen në faqen e tij në Facebook.
“Kënaqesi e posaçme mikpritja e kryebashkiakut të Nju Jorkut ne stacionin e pare te vizites ne SHBA. Thank you so much Mayor @deBlasioNYC”, shkruan Rama.
Ndërkaq, komisionerja për Çështjet Ndërkombëtare në Bashkinë e New Yorkut, Penny Abeywardena, i ka uruar mirëseardhjen kryeministrit të Shqipërisë.
“Edi Rama, të lumtur që ju mirëpritëm sot në zyrën e kryebashkiakut të New Yorkut. Komuniteti shqiptar, i rëndësishëm për përbërjen e larmishme të City-t”, shkruan komisionerja në Twitter.
Rama ka shkruar edhe se në New York u prit nga një numër i madh shqiptarësh.
“Faleminderit çdokujt që me praninë sonte e bëri takimin me shqiptarët e Nju Jorkut kaq mbresëlënës për numrin e madh dhe energjinë pozitive”, shkruan Rama.
Kreu i qeverisë ka nisur një vizitë disa ditore në SHBA ku pritet të zhvillojë takime të rëndësishme në Departamentin e Shtetit, Kongresin dhe Senatin amerikan.
