Aleanca për Shqipërinë Evropiane ka vijuar turin e saj të prezantimit të kandidatëve, ku sot kanë prezantuar Adelina Tharricin kandidate për bashkinë e Matit në zgjedhjet vendore.
Në fjalën e tij kryeministri Edi Rama i bëri thirrje qytetarëve matjanë që të votojnë më 21 Qershor “drejtimin e duhur”, duke zgjedhur kandidatët e majtë për bashki. Sipas Ramës, kandidatët e SHQUP-it dhe vetë Partia Demokratike nuk kanë sjellë asnjë ndryshim dhe asnjë model ndër vite.
Rama iu drejtua qytetarëve se nëse do të duan të zgjedhin shërbëtorë për ta, atëherë më 21 Qershor të zgjedhin kandidatët e ASHE-së. Në të kundërt nëse do të duan mbret le të votojnë ish-Kryeministrin Sali Berisha.
“Votat për ASHE-në në 21 Qershor do të jenë të vrullshme dhe të shumta si shiu ditën e sotme. Kandidatët tanë janë drejtimi i duhur. Ndërsa PD nuk di të bëjë gjë tjetër veçse të mbjellin baltë dhe akuza. Prandaj nëse do të doni të zgjidhni një shërbëtor votoni ASHE. Në të kundërt nëse doni mbret shkoni dhe votoni Sali Berishën.” u shpreh kryeministri Rama
