Partia Socialistë ka festuar ditën e sotme 25-vjetorin e forumit të saj rinor në ambientet e Pallatit të Kongreseve. Në praninë e të ftuarve dhe anëtarëve të saj, FRESSH ka promovuar punën e tij ndërsa drejtuesit thanë se transformimi i forumit rinor ka kaluar disa etapa të suksesshme.
“Faleminderit të gjthëve që jeni akoma këtu. U takuam përpara dy ditësh me skuadrën drejtuese që më pyetën nëse kam ndonjë merak. Testi i parë i punës që keni bërë do të jetë nëse deri në fund do të ketë në sallë po aq njerëz sa erdhën në fillim. Kjo tregon se ju nuk keni ardhur për kuriozitet apo për figurantë, por si përfaqësues të një FRESSH-i që është në një transformim shumë të rëndësishëm” – tha Rama në fillim të fjalës së tij.
Para të rinjve Rama theksoi se më 18 qershor Partia Socialiste do të ketë më shumë anëtarë dhe simpatizantë seç kishte në qershorin e 2013-ës.
“Po marr shkas nga disa komentues negativë në rrjetet sociale. Po marr shkas nga disa që ironizojnë, shajnë dhe mallkojnë çdo shfaqje të politikës dhe tallen me ata të cilët bëhen pjesë e procesit politik. Nuk mungonin edhe ata që talleshin me ju. Ka shumë njerëz që mendojnë se mjafton të thuash se politika është punë e pisët dhe shpëtojnë. Në fakt, sa më pak të merren me politikën,aq më shumë janë të detyruar të paguajnë kosto. Vetëm përmes pjesëmarrjes mund të kemi një politikë më të mirë. Të merresh me politikë nuk do të thotë të braktisësh ëndrrat, por të japësh një kontribut qytetar që politika të bëhet më e mirë” – tha kreu i PS.
Në fjalën e tij, kryeministri Edi Rama tha se i vetëm nuk mund të zgjidhësh dot asnjë problem që lind, apo që e ke para shtëpisë tënde.
“Prandaj është politika, që sëbashku njerëzit të bëjnë të mundur gjëra të cilat nuk i zgjidhin dot” – tha Rama.
Thirrjet për bashkim të Ramës erdhën pas zërave brenda LSI se partia në fjalë mund të dalë e vetme në zgjedhjet e vitit 2017. /java/b.d
