Kryeministri Edi Rama ka reaguar ashpër pas protestës së dytë kombëtare të zhvilluar ditën e djeshme, 10 shkurt.
Duke ndarë një foto të sendeve me të cilat janë sulmuar punonjësit e policisë, ai shkruan se forca më e madhe opozitare në vend është e vetmja Parti Demokratike në botë që ushtron dhunë.
“Këto janë bombat artizanale me të cilat janë sulmuar dhe djegur e plagosur mbrëmë punonjësit e policisë, nga e vetmja parti politike në botën demokratike që ushtron dhunë dhe e dyta në historinë e botës së tërë – pas asaj të famëkeqit Robert Mugabhe të Zimbabves – që i shkon mbrapa një 80 e kusur vjeçari të damkosur e të lajthitur!
Uroj që drejtësia të bëjë drejtësi për policët e plagosur dhe të ndëshkojë pa ngurrim bartësit e këtyre armëve me kapacitet vdekjeprurës!
Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur rrugën drejt Shqipërisë 2030 në Bashkimin Europian”, shkruan kreu i qeverisë.
Tubimi i thirrur nga opozita, njëjtë si ai i datës 24 janar, u shoqërua nga tensione dhe përplasje të forta në bulevard.
Situata më kaotike u shënua para Parlamentit. Protestuesit hodhën bomba molotov dhe fishekzjarrë në drejtim të tyre. Uniformat blu reaguan me ujë me presion dhe gaz lotsjellës.
21 persona janë ndaluar për dhunën gjatë protestës mbrëmë, ndërsa 19 efektivë janë shtruar në spital, pas lëndimeve që kanë marrë. Dy prej tyre mësohet se janë në gjendje të rëndë.
Mes protestuesve të arrestuar ka edhe të mitur. Po hetohen edhe pesë anëtarë të PD-së, Sekretari Organizativ Ervin Minarolli, si dhe katër deputetët Flamur Noka, Belind Këlliçi, Luçiano Boçi dhe Klevis Balliu.
