Kryeministri i vendit Edi Rama ka komentuar sot fenomenin e terrorizmit që po kërcënon Evropën. Në një intervistë të shkurtër për Mustafa Nanon në ‘Zululand’, Rama u ndal edhe te sjellja e myslimanëve shqiptarë.
Në Tema TV, kreu i qeverisë solli shembullin e një miku të shqiptarëve, siç e quajti ai, i cili para përfaqësuesve evropianë ka deklaruar se “shqiptarët janë myslimanët tuaj.
“Myslimanet shqipatrë janë një aset i madh dhe i vyer i Europës. Këtë gjë e them kudo dhe në mënyrë të vazhdueshme. Sot kemi më shumë aleatë se më parë” – tha Rama.
Sipas tij, Evropa duhet të bëjë më të mirën për ta sepse nuk i duhen vetëm Europës, por të gjithë botës për t’i treguar që problemi janë elementët radikalë dhe jo myslimanët.
***
Kreu i Ekzekutivit tha se është e papërceptueshme që një person i shpallur në kërkim në Francë, të jetë i paskeduar në Bruksel dhe tre ditë pasi kapet ai, ndodh atentati.
“Duhet bashkëpunim më i madh”, tha Rama.
Kryeministri tha se “kjo është dobësia e Europës për të krijuar një sistem inteligjence, për të bërë të mundur që një person që orkestroi atë që ndodhi në Francë, të mos kalojë kufijtë e më pas të kapet në Bruksel. Ky person del në një vend i skeduar dhe në një vend tjetër i pa skeduar. Duhet sistem i përbashkët mbrojtje e sigurie. Nuk kemi një provë që mbyllja e kufijve do të rrisë sigurinë, nuk kemi një provë që cedimi i privatësisë sjell rritje të sigurisë. Kjo e terrorizmit nga njëra anë dhe emigrantët nga krahu tjetër”.
“Unë patjetër që kam besuar në BE, dhe besojë tek projekti që kanë themeluar etrit e BE. Të thuash sot që Europa nuk funksionon thua një të vërtetë, të thuash këtë se projekti është i paplotë apo ka çalime të tjera, është një zgjidhje. Unë mendoj se është projekt i paplotë. Duhet të kemi një pamje të thjeshtë e të qartë të botës myslimane. Ajo është rreth diçka më shumë se 1.5 miliard njerëz dhe nga këta, 150 milion janë pjesë e botës myslimane. Pra, 10 % që ka një lexim pa mundësi interpretimi apo leje leximi të kuranit, janë vetëm 150 mijë e botës myslimane që përbëjnë rrezik potencial. Pra në thelb vetëm 1% e botës myslimanë shkakton rrezik. Dhe ky 1 % nuk mund të cënojë botën e tërë myslimane”, tha Rama.
“Edhe fenomeni Donald Trump është shprehje e injorancës. Mjafton të dalë një person të flasi kundër myslimanëve dhe të gjithë emocionohen, duke krijuar ngazëllim tek Maria Le Pen në Francë apo të tjetër që nuk përfaqëson vlerat tona të përbashkëta europiane. Donald Trump do të jetë një fatkeqësi për Amerikanët nëse zgjidhet”, tha Rama.
Ai shtoi se ‘përgjegjësia është e përbashkët, strategjike dhe ideologjike, jo vetëm e një personi”.
