Nga Lorenc Vangjeli/
Tre partitë e mëdha në Shqipëri kanë zgjedhur mënyra të ndryshme për të parë mbrapsht se çfarë ka ndodhur në 21 qershor. Duket se fitimtarët kanë zgjedhur të analizojnë rezultatin, kurse humbësit të dëshmojnë se nuk ka qenë faji i tyre për humbjen.
Socialistët e Ramës kanë vendosur të bëjnë një fushatë të gjerë zgjedhore kësaj here në nivel partiak e në të gjitha nivelet e partisë së tyre. Duke nisur që me postin e kryetarit të saj, që ka qenë vazhdimisht një mollë e preferuar për sherr nga kritikët e tij brenda PS-së. Edhe kësaj rradhe socialistët do të votojnë sipas parimit një antar, një votë dhe sërish me vetëm një kandidat, Ramën. Kali fitues nuk ndërrohet dhe kështu është e sigurt se Rama në vjeshtë do të ketë një mandat të ri në krye të partisë së tij. Ai pason në vite konkurrimin e tij të parë në këtë post në dhjetor 2003 dhe më pas, mandatin e tij të parë që nga viti 2005-a, në vijim pandërprerje.
Fushata zgjedhore në parti do të jetë një pasqyrë e rezultateve të 21 qershorit dhe do të shërbejë dhe për qortimin e tyre politik; kush ka humbur do të ikë!
LSI, aleati kryesor i socialistëve në qeverisje ka nisur të bëjë analizën e shifrave të saj në zgjedhje. Duke marrë për momentin rezultatin më të mirë historik të saj në proporcional dhe duke fituar shumicën e bashkive në të cilat konkurroi, ajo ka zgjedhur kritikën në vend të festës. Dy bashki të humbura, kryesisht ajo e Pogradecit dhe e Vorës janë në qendër të kërkimit të “pse ndodhi kështu”. Në Pogradec është paralajmëruar që prej më shumë se një jave se do të ketë një riorganizim total të strukturave partiake. Në Vorë, ku diferenca mes kandidatëve ishte më e vogël se sasia e votave të kontestuara, LSI vendosi që të mos e shtyjë më tej procesin e ankimimit. Për Ilir Metën nxjerrja sa më shpejt e rezultatit përfundimtar dhe nisja punë e të zgjedhurve të rinj lokalë është më e rëndësishme se gjykimi i Vorës dhe për atë që ndodhi në Vorë.
Në PD analiza ka nisur me këmbën e mbarë. Fillimisht, me daljen e shifrave pothuaj zyrtare të zgjedhjeve dhe mbasi u mësuan pothuaj gjithë emrat e bashkiakëve të rinj, PD zgjidhi dilemën e fortë: fituam apo humbëm në zgjedhje? Një ushtrim matematike i llojit: cili numër është më i madh, shtata apo treshi. Pak a shumë sa është edhe diferenca në përqindje mes dy koalicioneve në garë.
Basha ka premtuar se do të bëjë transparencë të procesit zgjedhor dhe se do të shpjegojë rezultatin e partisë së tij. Por, ndryshe nga dy rivalët e tij, Bashës i është dashur edhe të saktësojë qëndrime të ndryshme brenda koalicionit të tij të motivuar për të gjetur një motiv për betejë politike. Ai ka mohuar deklarimin e djeshëm të kryetarit të PR-së Fatmir Mediu, sipas të cilit në PD ekzistonte ideja se rikthimi në pushtet do të bëhej vetëm në rast të një koalicioni me LSI-në e Ilir Metës. Mediu tha se ai vetë do të zgjidhte PS-në në një rast të tillë. Në fakt ky është një qëndrim realist; gjykuar nga shifrat e sotme dhe trendi i afërt i humorit politik të publikut, PD ngjan se të vetmen mundësi për të ardhur në pushtet e ka nëpërmjet aleancës me një nga dy partitë e majta. Por Basha e korrigjon këtë mundësi. E korrigjon dhe e mohon. Basha thotë se: “…PD nuk bën zgjedhje mes dy të këqijave, por ka zgjedhur të jetë në krah të shqiptarëve për të luftuar çdo të keqe. PD dhe demokratët nuk kanë interes kryesor t’i hipin kalit të pushtetit, por kanë interesin e qytetarëve. Aleanca jonë do të jetë vetëm me shqiptarët”, tha kryetari i PD-së Basha. Duke premtuar në të njëjtën kohë pritje të gjaë, ende të gjatë e për një kohë të papërcaktuar për militantët e tij në dyert e pushtetit. Shifrat elektorale dhe humori i shqiptarëve i mbajnë ato ende të mbyllura me disa dryne. Siç janë kyçur shumë ndryshe nga njëri-tjetri në qëndrime tre protagonistët e zgjedhjeve, siç është shumë i ndryshëm një trinom politik me tre kulme, Rama, Meta dhe Basha.
