Pas vizitës së kryetarit të Kuvendit, Ilir Meta në Athinë, radhën e ka pasur një tjetër figurë e lartë e LSI, njëkohësisht edhe Ministër i Drejtësisë, Ylli Manjani. Ky i fundit është i ftuar në kongresin e SYRIZA-s, që drejtohet nga kryeministri grek, Tsipras.
Janë dy vizita që në shtetin grek që bien jo pak në sy, po të kemi parasysh se Athina zyrtare ka mbajtur një raport të distancuar me kryeministrin aktual, Edi Rama, i cili prej tre vitesh ende nuk ka zhvilluar një vizitë zyrtare në vendin fqinj. Me gjasë, është kjo ftohtësi që ka bërë që PS-ja të mos dërgojë përfaqësues të sajin në kongresin e SYRIZA-s, ndonëse të dyja këto forca politike janë të spektrit të majtë.
Ka jo pak pikëpyetje pse Athina zyrtare ka zgjedhur Metën si bashkëbisedues të sajin për problemet që ajo ka me qeverinë e z. Rama. Por qartazi kuptohet se duket ftuar Metën në Athinë dhe duke e pritur atë me një protokoll të plotë shtetëror, zyrtarët më të lartë grekë kanë dhënë edhe një mesazh sfidues ndaj kreut të qeverisë shqiptare.
Në fakt ajo që prej shumë kohësh që përflitej nën zë në raportet politike e diplomatike mes Greqisë dhe Shqipërisë, sidomos sa i përket çështjes çame, ligjit të luftës, varrezat e ushtarëve grek dhe marrëveshja e detit, gjatë këtyre tre viteve të fundit, në jo pak raste, është artikuluar qartazi nga zyrtarët e lartë shqiptarë, duke filluar që nga kryeministri Rama, ministri i jashtëm Ditmir Bushati. Ata kanë evidentuar faktin se zgjidhja e problemeve mes dy vendeve duhet bërë me guxim politik dhe në raport barazie mes dy vendeve.
Për një kohë të gjatë Athina zyrtare duket se ka qenë e privilegjuar në negociatat me palën shqiptare, duke u ulur në tryezë rregullisht nga pozitat e forcës, e jo të barazisë. Për këtë mjafton të shikohet mënyra sesi u punua dhe rezultati që prodhoi “Marrëveshja e detit” mes Shqipërisë dhe Greqisë, e sigluar nga qeveria e ish kryeministrit, Berisha. Nga ana tjetër vetë qeveria Berisha, nuk artikuloi asnjëherë problemin e Çamërisë. Berisha nuk donte probleme. Thjesht donte ta shtynte sa më gjatë të ndejturin në pushtet. Duke përmbushur një tabu të vjetër të tijën: shmangien e problemeve me fqinjin jugor!
Por me forcimin e bashkëpunimit mes PS dhe PDIU-së në muajt e fundit, duket se kanë ardhur edhe reagimet e para të krerëve të LSI, të cilët duket se vendosën të bëjnë lëvizjen e paritur drejt Athinës, me qëllim që të acarojnë e të kompleksojnë edhe PDIU, edhe linjën e ashpër të qeverisë Rama. Ajo që u vu re gjatë vizitës së Metës në Greqi ishte fakti i mungesës së sinkronizimit të qëndrimeve mes tij dhe qëndrimit zyrtarë të qeverisë shqiptare, si për çështjen çame, ligjin e luftës dhe “memecërinë” e tij për Marrëveshjen e detit. Kjo, përtej faktit se një shtet serioz, për problematika kombëtare mban qëndrime të njehësuara. Inati për Dibrën, mund ta ketë shtyrë Ilir Metën drejt Athinës…por “me shpenzimet” e interesave tona kombëtare!
Armando Meta
