Kryeministri Edi Rama ishte sot i pranishëm në një takim me të rinjtë italianë ku foli për ekonominë dhe biznesin në Shqipëri. Në fjalën e tij Kryeministri Rama theksoi se Shqipëria la pas periudhën e errët të borxheve ndërsa sot synon rritjen e investimeve të huaja. Në këtë kuadër, Rama vlerësoi bashkëpunimin me bizneset italiane në vendin tonë.
Në fund shefi i qeverisë preferoi ta mbyllë me një batutë, ku tha se shqiptarët dhe italianët janë dy popuj të ngjashëm në tipologji. Por me humor ai tha se ndryshimi është se nëse italianët kanë Leonardo Da Vinçin, shqiptarët kanë Skënderbeun.
“Edhe pse trashëguam një mal me borxhe, brenda dy viteve ne arritëm ta kthejmë këtë situatë. Sot ne synojmë të mbështesim biznesin dhe jo ta penalizojmë. Duhet të eksplorojmë mundësitë e reja për biznes. Por ligji duhet të jetë i njëjtë për të gjithë. Por duhet pasur parasysh që drejtësia nuk është një mall që blihet e shitet. Ne synojmë të thithim sa më shumë investime, që do të thotë edhe vende të reja pune. Në këtë kuadër kemi një bashkëpunim shumë të mirë me italianët. Në Itali kemi një qeveri që po bën çmos që të jetë zëri i sipërmarrjes, dhe shtysa për të rrëzuar barrierat e ngritura ndër vite. Dhe ndërkohë që bën atë betejë atje këtu e keni gati që të nisni t’i realizoni gjërat. Ne jemi shumë të lumtur sepse ky është një vend, ku të gjithë ata që investuan janë të mendimit se kanë bërë gjënë e duhur. Ne jemi dy popuj të një tipologjie, sigurisht ju keni Leonardo Da Vinçin ne kemi Skënderbeun. Pra ju i ngjani Da Vinçit saç i ngjajmë ne Skënderbeut apo grekët Platonit.” u shpreh kryeministri Rama
