Kryeministri Edi Rama, ka folur sot në Kuvend për nismën e qeverisë për mbylljen e lojërave të fatit dhe basteve sportive
Rama ka folur për sulme ndaj deputetëve të maxhorancës, të cilat sipas tij orkestrohen nga burgu 313, duke mos përmendur emrat.
Sa i përket basteve online, Rama sqaroi se do të ketë një tjetër diskutim se si do të procedohet, por shtoi se nuk do të ketë asnjë monopol shtetëror.
Rama tha se pas pas 1 janarit, nuk do të ketë më asnjë lloj basti dhe asnjë lloj loje elektronike në zonat e banuara. Nuk ka spostim në periferi, kazinotë do të jenë vetëm në hotelet me 5 yje.
“Jam shumë i keqardhur që një pjesë e deputetëve dhe posaçërisht deputetët e Komisionit të Financave dhe Ekonomisë janë kthyer në shënjestër e një sulmi vulgar mesazhesh të orkestruara nga burgu 313. Por, nga ana tjetër jam shumë i sigurtë se ky grup parlamentar do t’u japë prindërve të këtij vendi, nënave, grave, vajzave edhe atyre që janë aktualisht të sëmurë nga marrëdhënia me fatin, një dhuratë të shumëpritur dhe terapeutikisht të domosdoshme, mbylljen e kazinove elektronike, të basteve sportive dhe të basteve online.
Përsa i përket online-it, që është një drejtim shumë kompleks, do të arrijmë në një konkluzion të studiuar dhe do të mund të kemi një diskutim të mëvonshëm. Ka propozime të ndryshme edhe sa i përket idesë së një monopoli shtetëror të lojërave të fatit. Por, që sot po ja u them unë personalisht, jam kundër. Megjithatë të gjitha diskutimet janë të hapura. Kazinotë do të jenë të mundura vetëm për hotelet me 5 yje në zonat e definuara me vendim të qeverisë si zona turistike. Asnjë lëshim në asnjë hapësirë tjetër. Të gjithë përfitojnë nga mbyllja e kazinove. Fatkeqësisht, por realisht, ata që mungojnë janë pjesë e atyre që po agresojnë një pjesë të deputetëve të kësaj shumice. Berisha është vënë në funksion të një fushatë shpifjesh që organizohet nga krimi i organanizuar”, tha Rama
Kryeministri Rama tha se, sipas studimeve, fëmijët e nisin bixhozin në moshën 10-15 vjeç, ndërsa 73% të atyre që luajnë bixhoz përjetojnë stres. Duke bërë kështu që 1 në 4 lojtarë, kanë çuar në mendje të vetëvriten.
Nga ana tjetër Rama ka theksuar se edhe Franca i ka mbyllur bastet, duke shpjeguar se nëse tenton të hapësh pikë bastesh, dënohesh me 3 vjet burg.
“68% e lojëtarëve aktiv të basteve kanë nisur aktivitetin në moshë të hershme, 10 deri në 15 vjeç, dhe kjo është arsyeja pse Franca ka ndaluar me ligj hapjen e cdo salloni bastesh”, tha Rama.
Po ashtu, Rama tha se deputetë të PS po kërcënohën nga burgu 313.
Javanews/a.ç
