Ashtu siç ishte paralajmëruar edhe gjatë konferencës së fundvitit, kryeministri Rama do të mbledhë nesër dhe pasnesër ministrat, drejtorët dhe krerët e PS-së në Shëngjin në kuadër të një vlerësimi të punës së vitit 2023 dhe të objektivave për vitin aktual.
Mbledhja, e quajtur edhe si “retreat” do të ketë në fokus analizimin e punëve të bëra gjatë 2023 dhe objektivat e vitit 2024, për shkak së bëhet fjalë për njëvit elektoral.
Zgjedhjet e përgjithshme priten në fillim të vitit 2025 dhe 2024 konsiderohet si një vit elektoral.
Gazetarja e Vizion Plus, Enkelejda Mema bën me dije se në këtë mbledhje do të marrin pjesë ministrat, drejtorët e drejtorive të rendësishme si edhe krerët e Partisë Socialiste.
Gjatë mbledhjes do të bëhet edhe një vlerësim i performancës së ministrave dhe drejtorëve për vitin që lamë pas.
Kujtojmë se në konferencën tradicionale të fundvitit, kryeministri numëroi arritjet e Shqipërisë për vitin 2023.
Sipas tij, një ecuri shumë të mirë kanë pasur ekonomia e vendit, siguria, shërbimet publike, etj.
Rama tha se rritja ekonomike e këtij viti i kalon parashikimet, ku ka ndikuar edhe bumi masiv i turistëve.
Ai u shpreh gjithashtu se ky vit ka pasur rënie të mëtejshme të papunësisë reale dhe sot vendi ka një papunësi që është më e ulta e të gjitha viteve deri tani.
/f.s
