Kryeministri Edi Rama ka postuar një status në facebook me pjesë nga raporti i kompanisë së vlerësimit Fitch në Londër për ekonominë shqiptare. Rama ka ironizuar me Berishën për raportin që vlerëson arritjet e Shqipërisë. Mes të tjerash, në raport theksohet se “nëse vijnë të djathtët në pushtet rrezikohet ekonomia”.
Kjo kompani, dikur vlerësohej maksimalisht nga Berisha kryeministër.
Përballë gjetjeve të raportit, Rama ngre pyetjen duke ironizuar: Kush gënjen…?
Postimi i Ramës me pjesë nga raporti:
KUSH GËNJEN? (10)
Sali Berisha, 10 korrik 2013: “Auditin më të shkëlqyer financave shqiptare ia ka bërë Fitch në Londër!”.
Po çfarë thotë sot gjigandi i financave ndërkombëtare?
“Shqipëria ka bërë progres në adresimin e rreziqeve që vijnë nga paqëndrueshmëria politike, por testi i vërtetë do të jenë zgjedhjet e 18 qershorit. Qeveria socialiste në pushtet, me shumë gjasa do të rikonfirmohet, çka do t’i japë vendit stablitetit politik”.
Një fitore e papritur e demokratëve, konsiderohet nga ky grup prestigjoz, si një prej “rreziqeve kyç” që kërcenon potencialisht Shqipërinë:
“Rreziku i një regresi ekonomik do të ishte shumë më i madh, nëse opozita do të vinte në pushtet”, shkruhet në raport.
Në lidhje me ekonominë shqiptare, vlerësohet se “do të vazhdojë të jetë një prej ekonomive me rritjen më të shpejtë në rajon gjatë të paktën dy viteve të ardhshme”.
