Kryeministri Edi Rama, konferencën BE – Ballkani Perëndimor në ditën ndërkombëtare të medias, e përdori për të tërhequr vëmendjen tek shkeljet që media sipas tij i bën dinjitetit njerëzor të njerëzve publikë, veçanërisht politikanëve.
Për këtë ai solli shembullin e një çështjeje të gjykuar nga Gjykata Europiane e të Drejtave të Njeriut në favor të një deputeti austriak, të akuzuar për korrupsion.
“Një prej çështjeve më të famshme që ka gjykuar Gjykata Evropiane e të Drejtave të Njeriut, është një çështje e vitit 2005, e revistës ‘Profil’, kundër një deputeti austriak, i cili ishte vendosur nën hetim për një shkelje në një kontekst të caktuar, ishte larguar nga vendi për një kohë të caktuar sëbashku me bashkëshorten e tij dhe revista bën një artikull ku i etiketonte si “Bonnie dhe Clyde” austriak. Gjykata Europiane e të Drejtave të Njeriut vendosi në favor të deputetit, sepse konotacioni negativ i etiketimit “Bonnie dhe Clyde”, çifti i famshëm i dy kriminelëve, për të cilët janë bërë dhe shumë filma në ShBA, dëmtoi dinjitetin njerëzor të tij dhe të bashkëshortes.”
Kryeministri se shtoi se “për fat të keq, shkelje të tilla në cenim flagrant të dinjitetit njerëzor të njerëzve publikë në Shqipëri zhvillohen nga mëngjesi deri në darkë, dhe tani që ne po flasim këtu, me siguri është duke ndodhur një shkelje e kësaj natyre.”
Rama solli në kujtesë edhe fjalët e një gazetari polak që provoi burgosjen, sipas të cilit “fjalët vrasin të parat, plumbat vijnë mbrapa.”
Kryeministri tha se ka një sfidë për të forcuar lirinë e medias, por edhe një tjetër për të rritur frymën e përgjegjësisë nga ana e medias.
“Sot unë besoj se sfida është e dyfishtë, nga njëra anë për të forcuar lirinë e medias, dhe nga ana tjetër për të rritur frymën e përgjegjësisë në përdorimin e kësaj arme, që e përsëris ka lindur për të mbrojtur lirinë, vlerat dhe parimet e një shoqërie që beson tek liria e informacionit dhe jo për të vrarë me fjalë në emër të lirisë dhe përdorimit të saj. Dhe është e pamohueshme që sot ne kemi një problem të rëndësishëm që është pjesë e një problemi tërësor trasformimi, jo vetëm të ligjeve, por në mendësi, që ka të bëjë me shfrenimin e gjuhës së urrejtjes.”
