Mbledhja e sotme e koordinatorëve të PS-së me kryetarin Rama ka konkretizuar disa afate të reja për zhvillimin e punëve në parti. Ndryshe nga c’ishte parashikuar nga Asambleja që procesi zgjedhor në bazë të përmbyllej në dhjetor, dhe në janar të mblidhej kongresi, vonesat kanë shtyrë afatet.
Kështu, procesi i zgjedhjes së kryetarëve të organizatave do të përmbyllet brenda muajit janar, teksa është lënë të punohet për përgatitjen e kushteve që brenda këtij muaji të mund të zgjidhen kryetarët e partisë për 61 degët e PS-së, që përbëjnë 61 bashkitë e vendit.
‘Report TV’ shkruan se në ato bashki ku procesi i zgjedhjeve në organizata ka mbaruar, nuk mund të zhvillohen ende zgjedhjet për kryetar pasi procesi do të zhvillohet në një ditë të vetme për të gjitha bashkitë e vendit.
Këto degë të partisë që kanë ecur me afatet, gjatë muajit janar do të punojnë me zgjedhjen e delegatëve për në Kongresin e PS-së, mbledhja e të cilit është e pamundur në janar, dhe afati më i mundshëm është marsi. Përcaktimi i numrit të delegatëve do të bëhet sipas kritereve të përcaktuara në asamble në korrik të vitit të shkuar, sipas parimit 1 delegat= 100 anëtarë partie dhe do të respektohet kuota gjinore 50% gra, nismë kjo e paraqitur nga kryeministri Rama. –
