Kryeministri Edi Rama foli për përmirësimin e të gjithë elementëve që përbëjnë jetën në punë, duke shtuar se sa më shumë të përmirësohen, aq më shumë secili mund të presë nga vetja, dhe të gjithë bashkë të presim nga puna jonë.
Duke folur në prezantimin e planit të motivimit të administratës publike, Rama tha se ka gjithmonë vend dhe arsye për tu përmirësuar.
Me një batutë, Kryeministri tha se ai numërimi i orës 8:00 te dera është kthyer në një akt formal të disiplinës dhe kjo bëhet nga ato shefat që nuk i numëron njeri te dera kur hyjnë në institucion.
Rama tha se me praktikën e numërimit të dera ta heqin qejfin e ditës së punës a thua se në orën 08:01 do të nisej raketa në hënë dhe po mos nisej do të dështonte operacioni.
“Fleksibiliteti në punë ka qenë e pamundur ta mendoje për shkak se numrin më të madh të punonjësve e kishim të angazhuar në shërbimin e drejtpërdrejtë me qytetarët. Sot shërbimet i afrojmë në 95% të tyre online. Sot nuk ka më rradha, që të presësh, që të shkosh dhe të rrish në sportele”, tha Rama.
Kryeministri u shpreh se kemi një perceptim të ngritur vit pas viti, ditë pas dite, sikur në administratë lëvizen thasë me lekë, etj etj, dhe kur ka raste të arrestimit të zyrtarëve, ka një përpjekje për të thënë se ja kështu janë të gjithë.
“Por administrata nuk është çerdhja ku janë mbledhur gjithë djajtë dhe ndodhin gjithë gjërat e këqia”, tha Rama. Sipas tij, janë qindra pjesëtarë nga kjo administratë që kanë përfaqësuar Shqipërinë në tryezën e negociata me BE-në, që do të thotë se ne kemi në administratën tonë një aset të jashtëzakonshëm kombëtar.
“E shoh dhe e vlerësoj punën tuaj si një aset të rëndësishëm kombëtar. Fakti që po ekspozohen dhe trajtohen rastet e korrupsionit deri në nivelet më të larta, është një tregues që ne nuk kemi pse të ulim kokën, por duhet të krenohemi që shyqyr që po ndodh, pasi ka qenë një fakt i njohur niveli i korrupsionit, që flitej nga të katër anët, por askush nuk ekspozohej”, tha Rama.
Ai e krahasoi këtë që po ndodh me ekspozimin e së keqes brenda administratës me atë fazën kur hyn dikush në një operacion dhe i shikohet ajo pjesa e keqe.
“Fakti që ne, Shqipëria, përballemi me një proces aq të komplikuar, aq sfidues dhe profesional si ai i skrinimit të shtetit shqiptar, me aq sukses, dhe kjo u pohua në mënyrë të përsëritur nga partnerët tanë, është një arsye shumë e fortë për tu ndjerë të motivuar dhe do tia dalim misionit për të pasur një administratë publike që është në lartësinë e ambicieve të kësaj Republike, sepse ne e kemi brumin, kemi një ndërthurje shumë të ekujlibruar të eksperiencës me energjitë e reja”, tha Rama./m.j
