Kryeministri Edi Rama ka hedhur poshtë zërat për ndërtimin në Shqipëri të një kampi refugjatësh.
Duke folur në ceremoninë e zhvilluar për çmimin që fitoi në Barcelonë sheshi “Skënderbej”, Rama e konsideroi lajm të rremë ndërtimin e një kampi për refugjatët në vendin tonë.
“Ishte një frazë e përsëritur shumë gjatë nga kundërshtarët e kësaj ndërmarrjeje transformuese, sipas të cilëve projekti ishte një projekt kriminal i bazuar tek ethet e një fitimi marramendës për shkak se sheshi nuk do të ishte asgjë tjetër vetëm se një zonë aktivitetesh ekonomike të atyre që do të përfitonin nga pushteti për të ndërtuar në shesh në pazar.
Ka qenë një nga mijëra lajmet e rreme që e bën Shqipërinë djep të fake news-t, përpara se fake news të shfaqej si epidemi botërore. Ka qenë një lajm i rremë siç është sot lajmi i rremë për një kamp refugjatësh, që do mbledhë refugjatë nga e gjithë bota këtu në Shqipëri, apo të tjera lajme të rreme që përhapen dita ditës. Është një betejë shumë e vështirë me lajmet e rreme, por koha i vë në vend të gjitha dhe vuri në vend drejtësinë e vizionit, idesë, e gjithë projektit të sheshit Skënderbej, që patjetër është kthyer në faqen e bardhë të kryeqytetit tonë”, theksoi Kryeministri.
Asgjë nuk është e vërtetë, theksoi Rama, lidhur me ndërtimin e një kampi të tillë.
Ndërkohë, një ditë më parë Presidenti i Parlamentit Europian Antonio Tajani tha se përfytyron mundësinë e kampeve në Shqipëri. Sipas tij, stabiliteti i Evropës varet nga Gjermania, dhe kjo e fundit po përballet me krizën e refugjatëve të paligjshëm.
a.ç
