Një investim prej 230 mijë eurosh, bashkëpunim i Ministrisë së Shëndetësisë dhe Save the Children, u ka siguruar banorëve të Laprakës një qendër shëndetësore bashkëkohore. Kryeministri Edi Rama, i shoqëruar nga ministrja e Shëndetësisë, Ogerta Manastirliu, inspektuan Qendrën e re.
“Është një qendër që ofron edhe shërbime plus për nënën dhe për gruan shtatzënë. Në fakt kemi një eko të re, e cila është instaluar pranë kësaj qendre, nuk ka qenë më parë dhe sigurisht, një shërbim i ri që ofrohet pra për nënën gjatë ndjekjes së shtatzënisë, por gjithashtu dhe me kushte standarde bashkëkohore ndjekjen e fëmijës” tha ministrja.
Kryeministri Edi Rama u shpreh se “Është e vetmja rrugë që të lehtësohet i gjithë shërbimi në spitale dhe që të ndahet shërbimi parësor me nevojat e menjëhershme të njerëzve me shërbim më të specializuar pastaj në qendrat e mëdha spitalore, se ndryshe do ishte e pamundur që të bëhet edhe njëra dhe tjetra dhe s’bëhet tamam as njëra as tjetra.
300 do bëjmë në këto 4 vjet”. Ministrja e Shëndetësisë tha se këtë vit fillon ndërtimi i 80 qendrave të para, nga totali i 300 Qendrave Shëndetësore të parashikuara për tu ndërtuar në 4 vite.
