Ndërsa qytetarët presin një zhbllokim të ngërçit politik, kryeministri Rama dhe kreu i opozitës Basha kanë gjetur një tjetër sebep sherri.
Deklaratat e një qytetari nga Cakrani i Fierit kanë bërë që dy liderët e politikës shqiptare të shkëmbejnë debate në distance. Madje, kreu i PD ka shkuar më tej duke e akuzuar si trafikant militantin e partisë së tij vetëm pse i kërkoi dialog me qeverinë.
Lulzim Basha i ka huazuar sot Berishës “Qytetarin Dixhital”, kur duke iu referuar një mesazhi anonim anatemon Xhafon publikisht. Dhe Rama, si ‘nxitësi’ i këtij debati që zë fill në ceremoninë e shpërndarjes së legalizimeve, mori përsipër t’i kërkojë falje në emër të Bashës.
Mesazhi i Bashës pas videos së transmetuar:
Njesoj si Ramizi me Vullnetaret e Enverit ne ditet e fundit te regjimit edhe Rama me Vullnetaret e Hashashit ne ditet e fundit te Republikes se Vjeter:
“Per dijeni tenden Kryetar ai qytetari qe bisedonte ne Cakran me Ramen dhe qe bente humor kinez quhet Xhafo Shenaj dhe ka zaptuar token e pronareve te ligjshem. Djali i ketij fshatarit Xhafo Shenaj qe bisedoi sot me Ramen ne Cakran eshte trafikanti dhe kultivuesi me i madh i hashashit ne Cakran. Qe nuk ben asnje pune dhe shetit me makine mbi 50 mije euro. Prandaj dhe ky i bente elozhe Rames dhe ironi Bashes sepse vete Rama e di qe ky Xhafo Shenaj ka parcela te mbjella ne bashkpronesi me Armando Subashin.”
Shënimi i Ramës si reagim ndaj kreut të PD:
Sot isha në Cakran të Fierit, ku ndër të tjerë pata edhe një dialog me zotërinë në videon bashkëngjitur.
Jam sinqerisht shumë i keqardhur për të, sepse për shkak të këtij momenti njerëzisht miqësor komunikimi që mund ta shihni vetë, u sulmua egërsisht (madje familjarisht) nga Lulëzim Basha si kriminel e si trafikant i shitur tek krimi!
I kërkoj shumë ndjesë zotërisë për fjalorin anormal të kryetarit të PD-së dhe i lutem atij e familjes së tij të mos e marrin seriozisht Lulëzim Bashën që mesa duket e ka humbur fare busullën.
