Ndërsa Partia Socialiste ka fituar zgjedhjet duke siguruar madje edhe e vetme formimin e qeverisë dhe shumicën parlamentare, kryeministri Edi Rama nuk e ka komentuar edhe publikisht, përveç se ndonjë statusi në rrjetet sociale.
Por sigurisht që kjo fitore e ka entuziazmuar kreun e PS-së i cili iu ka dërguar një mesazh kandidatëve për deputetë të kësaj force.
“BalkanWeb” zbardh tekstin e këtij mesazhi, ku Rama e nis me një thirrje “Ia dolëm”. Por sipas kreut të qeverisë kjo është përgjegjësia më e rëndë që mund të merrnim në shpatulla.
Rama fton të gjithë mbështetësit në festë në orën 18:30 në sheshin “Skënderbej”.
MESAZHI I PLOTË
Ia dolëm! Ia dolëm aty ku askush përveç nesh nuk e besonte se do ia dilnim! Shqiptarët na kanë bërë nderin më të madh që mund t’i bëhet njerëzve që kërkojnë votën e popullit për të mishëruar aspiratat, ëndrrat dhe shpresat e tyre! Kjo fitore është përgjegjësia më e rëndë që mund të merrnim mbi shpatullat tona. Ka fituar Shqipëria që kërkon shtet, punë, mirëqenie kundër partive që kërkojnë tepsinë e pushtetit në kurriz të popullit e në dëm të shtetit! Një bravo e madhe të gjithëve ju dhe gjithë njerëzve që u angazhuan në vijën e parë të betejës për Shqipërinë që duam✌ Sot në orën 18:30 në sheshin Skënderbej, për përqafimin e këtij momenti historik, me të gjithë ata që duan dhe mund të na bashkohen nga Tirana e nga çdo qark Rroftë Partia Socialiste e ShqipërisëRroftë Shqipëria”, shkruan Rama në “sms” për kandidatët për deputetë.
/a.m.
