Ekspozita “Qytetet e Kadaresë”, u çel në qytetin e Gjirokastrës, në kuadër të kremtimeve të vitit kulturor kushtuar Ismail Kadaresë në 80-vjetorin e lindjes.
E konceptuar dhe ndërtuar nga Biblioteka Kombëtare, mbasi zhvilloi me sukses dy stacionet e saj të para në Tiranë dhe Prishtinë, ekspozita u hap në “Shtëpinë Kadare”, në simbolikë të lidhjes emblematike mes shkrimtarit dhe qytetit të tij të lindjes.
Në përurimin e ekspozitës ishin të pranishëm, kryetarja e bashkisë së Gjirokastrës, Zamira Rami, drejtoresha e Bibliotekës Kombëtare, Persida Asllani dhe të ftuar të shumtë, si prefekti i qarkut, drejtorë të institucioneve kulturore e arsimore, por dhe personalitete të jetës kulturore të qytetit.
Ekspozita u hap falë bashkëpunimit të Bibliotekës Kombëtare me Bashkinë e Gjirokastrës dhe Ministrinë e Kulturës dhe do të qëndrojë e hapur për publikun deri më datë 20 maj, përcjell ATSH. (b.an)
