Drejtoria e QSUT “Nënë Tereza” sqaron lidhur me shkrimin e botuar në BIRN me titull “Mali i ilaçeve të skaduara në QSUT, shkakton kosto të shumëfishta”, se barnat dhe materialet mjekësore që përdoren në shërbimet mjekësore të QSUT janë konform çdo standarti dhe sigurie për pacientët.
Reagimi:
Në lidhje me barnat e skaduara ju sqarojmë se, ekziston një situatë problematike e trashëguar prej rreth 10 vitesh. Shkrimi i publikuar në BIRN, nuk ka asnjë lidhje me sigurinë dhe cilësinë e barnave që përdoren për pacientët në QSUT, të cilat janë te sigurta, brenda afatave kohore të skadencës.
Sqarojmë se barnat e skaduara janë magazinuar në ambiente të veçanta, të izoluara nga barnat e tjera, sipas Legjislacionit të Republikës së Shqipërisë.
Që prej vitit 2014 në QSUT aplikohet një procedurë e marrjes në dorëzim të barnave, bazuar në kontratat që lidhen mes operatorëve ekonomikë dhe QSUT-së, ku është shtuar një nen i cili thotë se “ që në të gjitha rastet kur barnat skadojnë, do të zëvendësohen me të njëjtin artikull por me afat më të gjatë skadence”. Gjithashtu ju bëjmë me dije se vitet e fundit, edhe donacionet për barnat, janë bërë me marrëveshje me firmat farmaceutike dhuruese ku deklarohet se në rastet e mospërdorimit të këtij bari, do të tërhiqet sasia e mbetur nga donacioni, mbrapsht. Kjo marrëveshje ka sjellë që sasia e barnave të dhuruara që nuk përdoren, të tërhiqen nga këto firma dhe të minimizohet sasia e barnave jashtë përdorimit në vitet e fundit.
Përsa u përket barnave të skaduara që janë mbetje të trashëguara para vitit 2014, ju sqarojmë se në zërat e ndarë të Buxhetit është parashikuar, planifikuar dhe është zhvilluar procedura në tenderim publik për asgjësimin e këtyre barnave të skaduara ndër vite. Operatorët ekonomikë ofertues nuk kanë plotësuar standardet e kërkuara sipas Legjislacionit në fuqi për evadimin dhe asgjësimin e këtyre barnave, duke u skualifikuar kështu nga kjo procedurë dhe duke çuar në anullimin e tenderit.
Aktualisht jemi në proces tenderimi për herë të dytë për këtë vit të procedurës për evadimin dhe asgjesimin e barnave të skaduara.
Theksojmë se elementet krahasimorë në këtë shkrim, nuk qëndrojnë, sepse nuk mund të krahasohet gjendja reale e stokut të barnave në përdorim (brenda afatit të skadencës), të disponueshme në Farmacinë Qendrore të QSUT, kundrejt stokut të barnave të skaduara të akumuluara gjatë 10 viteve të fundit.
