Ministrja e Zhvillimit Ekonomik, Milva Ekonomi, ftoi investitorët e huaj dhe vendës të shfrytëzojnë objektet shtetërore, të cilat janë të gatshme për t’u dhënë me qira 1 euro. Për këtë, brenda një kohe të shkurtër, qeveria do të bëjë të mundur inventarizimin dhe publikimin e të gjitha pronave që janë të lira për t’u shfrytëzuar nga bizneset me kontrata simbolike.
Nga Durrësi, Ekonomi u parapriu edhe ndryshimeve që do të pasojë paketa fason, duke thënë që krahas lehtësirave që janë aktualisht do të ofrohen të tjera.
“Ministria e Zhvillimit Ekonomik, Turizmit, Tregtisë dhe Sipërmarrjes ka marrë përsipër të listojë të gjitha pronat shtetërore, të cilat janë të mundshme për t’u dhënë bizneseve në zhvillimin e të tilla aktiviteteve si ky që është një shembull i një përkushtimi që vjen jo vetëm nga pala shqiptare, por edhe investitori italian për të vijuar aktivitetin e tij.
Paketa fason do të vijojë të mbështetet nga qeveria. Ata që do të kenë iniciativa për të dhënë ide investimesh do të përfitojnë nga kjo situatë e qirasë 1 euro, por edhe të tjera lehtësira do të shikohen gjatë vitit që vjen”, tha Ekonomi, e cila gjatë ditës së djeshme vizitoi ambientet e disa prej sipërmarrjeve të ngritura në vendin tonë, me qëllimin për të parë ecurinë e paketës fason një vit e gjysmë pas miratimit.
Bizneset e njohën ministren me rezultatet pozitive që ka sjellë kontrata e qirasë 1 euro. Por, krahas rëndësisë që qeveria i tregon biznesit të vogël e të mesëm, Ekonomi foli edhe për bizneset strategjike që kanë shprehur interes të investojnë në Shqipëri.
“Ministria e Zhvillimit Ekonomik, Turizmit, Tregtisë dhe Sipërmarrjes po shikon me shumë vëmendje të gjitha ato kërkesa për investime strategjike që ofrohen në ministri për sektorë të ndryshëm në zbatim të ligjit për të tilla investime.
Për këtë ndiqet modeli ‘One Stop Shop’, pra një dritare e vetme unike që është AIDA dhe aty mund të drejtohen të gjithë investitorët për të marrë informacion për çfarë është duke ndodhur në Shqipëri. Aktualisht, kemi 4 propozime nga investitorë strategjikë, në fusha të caktuara si turizëm dhe bujqësi, dhe janë duke u shikuar me kujdes nga grupi i ekspertëve”, u shpreh Ekonomi.
Panorama/d.i.
