Avokatët e tre perso ave të arrestuar, Emiljano Shullazi, Gilmando Dani dhe Blerim Shullazi, i janë drejtuar me rekurs Gjykatës së Lartë, ku kërkojnë lirimin e të mbrojturve prej tyre.
Avokatët pretendojnë ndër të tjera se, si vendimi i Shkallës së Parë, edhe ai i Apelit për Krimet e Rënda, janë dhënë në kundërshtim me ligjin, pasi për shtetasin Gilmando Dani urdhri i ndalimit ka dalë vetëm për dy vepra penale, ndërsa vendimi i gjykatës është dhënë për 6 vepra penale, duke iu shtuar gjatë kërkesës për caktimin e masës edhe 4 vepra të tjera.
Sipas avokatëve, një vendimmarrje e tillë nga ana e gjykatave është në kundërshtim me Kodin e Procedurës Penale. Gjithashtu, ndaj Gilmando Danit nuk ka asnjë dyshim të arsyeshëm, pasi atij nuk i është përmendur emri në asnjë rast për ndonjë episod ku është përfshirë dhe as nga deklaruesit nuk është përmendur. Këtij pretendimi të mbrojtjes, Gjykata e Apelit për Krime të Rënda i dha përgjigje duke e arsyetuar se: Nisur nga dënimet e mëparshme që ka pasur bashkë Emiljano Shullazi dhe Gilmando Dani si dhe fakti që më datë 14.04.2016 Emiljano Shullazi, miku i tij Gilmando Dani si dhe disa djem të tjerë të lagjes, kanë drekuar së bashku te shtëpia e Emiljano Shullazit dhe kanë porositur te lokal C…..U. Pra këta persona veprojnë bashkë, pasi drekojnë bashkë si dhe janë dënuar më parë bashkë. Dhe del bashkëpunimi.
Veprat penale për të cilat akuzohet Blerim Shullazi, ‘Mbajtje e municioneve’ dhe ‘Kultivim i bimëve narkotike’ (pasi i janë gjetur 12 kubikë kanabis), nuk janë nën juridiksionin e Krimeve të Rënda. Sipas mbrojtjes, arrestimi i Emiljano Shullazit ndodhi fill pas deklaratave të ish-kryeministrit Sali Berisha se Emiljano Shullazi ka kërcënuar rektorin e zgjedhur tashmë të Universitetit të Tiranës, Mynyr Koni, dhe rektorin në detyrë, Dhori Kule.
“Veprimet e para hetimore dhe urdhrat e ndalimit u firmosën nga zv.drejtuesi i Prokurorisë së Krimeve të Rënda, Besim Hadërmataj, i cili është nga Tropoja, ku fill pas kësaj u emërua si drejtues i Prokurorisë së Krimeve të Rënda. Dosja më pas iu caktua dy prokurorëve të tjerë, që njëri është po nga Tropoja”, thotë mbrojtësi ligjor i të pandehurve.
Sipas avokatit Alban Qafa, masat në shkallën e parë te Krimet e Rënda ndaj klientëve të tij u gjykuan nga një gjyqtar po nga Tropoja, duke i bindur avokatët se procesi është nën trysninë e politikës. Sipas avokatëve, ndaj klientëve të tyre ka pasur vetëm informacione në rrugë operative dhe asnjë kallëzim apo deklarim nga persona të pretenduar mediatikisht nga organi i akuzës se iu ishte vënë gjobë nga Emiljano Shullazi dhe Gilmando Dani, dhe se ndaj tyre nuk duhej të caktohej asnjë masë, e madje as të niste procedimi penal. Ndalimi i këtyre shtetasve është bërë sepse në bashkëpunim me njëri-tjetrin dhe me persona të tjerë, në kohë dhe qytete të ndryshme, kanë shtrënguar nëpërmjet kanosjes për dhënien e pasurisë në mënyrë të padrejtë biznesmenë të ndryshëm.
