Teksa krahu i të ardhurave buxhetore është përmirësuar disi këtë vit në krahasim me një vit më parë nuk është reflektuar e njëjta situatë edhe në krahun e shpenzimeve.
Buxheti i shtetit gjatë periudhës 9-mujore ka injektuar në ekonomi 77 milionë më pak se një vit më parë. Sipas të dhënave zyrtare të Ministrisë së Financave shpenzimet buxhetore ishin 10.5 miliardë lekë më të ulta se fakti i vitit 2015 ose 3.6 për qind më pak.
Shpenzimet panë mosrealizim edhe me planin e këtij viti me rreth 10.3 miliardë lekë më pak ose 3.5% më te ulta, raporton Monitor.
Uljen më të madhe në krahasim me planin e patën shpenzimet korrente, të cilat rezultuan 7.6 për qind më të ulta.
Nga ana tjeter shihet një përmirësim i ecurisë së shpenzimeve kapitale në raport me planin dhe faktin, pavaresisht se ato u rishikuan me ulje me të paktën tre miliardë lekë për periudhën 9 mujore. Sipas buxhetit fillestar ishin projektuar të shpenzoheshin për investime 37 miliardë lekë në janar-shtator.
Nga 34.4 miliardë lekë të programuara sipas planit te rishikuar për periudhën u realizuan 34.6 miliardë lekë me tejkalim 0.6%. Fondet nuk janë shpenzuar sipas programit edhe për pushtetin lokal. Shpenzimet dedikuar bashkive të reja ishin 3.3 miliardë lekë më pak ose rreth 11 për qind më të ulta se plani i periudhës.
Arka e shtetit shihet të ketë përfituar gjithashtu edhe nga interesat e ulta të borxhit. Shpenzimet për interesa ishin 1.4 miliardë lekë më pak ose 5.2 % më të ulta.
Shpenzimet e operative dhe të mirëmbajtjes ishin gjithashtu 419 milionë lekë më të ulta se programi i rishikuar i nëntëmujorit.
Gjithashtu me ulje në raport me planin e rishikuar ishin edhe shpenzimet për ndihmën ekonomike dhe ato për papunësinë përkatësisht me -4.1 % dhe -9.8%./a.m.
