Ne mbledhjen e te merkures, qeveria shqiptare miratoi në parim, marrëveshjen ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, për bashkëpunimin financiar 2011 për projektin “Efiçenca energjetike – programi për sektorin e transmetimit të energjisë elektrike”.
Qeveria miratoi marrëveshjen shtesë të koncesionit “Për disa ndryshime në marrëveshjen e koncesionit të formës “BOO”, ndërmjet Ministrisë së Industrisë dhe Energjetikës dhe shoqërisë “Teodori”, sh.p.k., Tiranë, për ndërtimin e hidrocentraleve në Ternovë dhe në Zall të Bulqizës”, miratuar me vendimin nr.556, datë 1.8.2003, të Këshillit të Ministrave, të ndryshuar.
Gjate mbledhjes se te merkures qeveria vendosi shpronësimin, për interes publik, të pronarëve të pasurive të paluajtshme, pronë private, që preken nga ndërtimi i segmentit rrugor “Kalimash – Morinë” (Shtesat). Shpronësimi të bëhet në favor të Autoritetit Rrugor Shqiptar.
Pronarët e pasurive të paluajtshme, që shpronësohen, do të kompensohen në vlerë të plotë, sipas masës përkatëse që paraqitet në tabelën bashkëlidhur këtij vendimi, për pasuritë “arë”, “truall” dhe “objekte”, me vlerë të përgjithshme shpronësimi prej 26 387 209 (njëzet e gjashtë milionë e treqind e tetëdhjetë e shtatë mijë e dyqind e nëntë) lekësh.
Qeveria vendosi miratimin e rregullave teknike për aparatet marrëse televizive, DVB-T2/MPEG4, me ndërfaqe të përbashkët, sipas tekstit, që i bashkëlidhet këtij vendimi dhe është pjesë përbërëse e tij.
Ngarkohen Ministria e Financave, ministri i Shtetit për Inovacionin dhe Administratën Publike, Ministria e Zhvillimit Ekonomik, Turizmit, Tregtisë, dhe Sipërmarrjes, Autoriteti i Mediave Audiovizive dhe Drejtoria e Përgjithshme e Doganave për zbatimin e këtij vendimi./ATSH/
