Një vendim i qeverisë i botuar në fletorën zyrtare autorizon shpenzimin e 12 milionë lekëve për organizimin e lojës promocionale, “Loja e kuponit tatimor”.
Këshilli i Ministrave vendosi që Ministrisë e Financave në buxhetin e miratuar për vitin 2015, t’i shtohet fondi prej 12 000 000 (dymbëdhjetë milionë) lekësh, për shpenzime korrente, në programin “Menaxhimi i të ardhurave tatimore”.
Ky fond të përballohet nga fondi rezervë i buxhetit të shtetit. Fondi do të përdoret nga Drejtoria e Përgjithshme e Tatimeve për përballimin e shpenzimeve administrative dhe çmimeve fituese të lojës promocionale, të quajtur “Loja e kuponit tatimor”, që do të organizohet nga data 15.11.2015–31.12.2015, në kuadër të nismës kundër informalitetit.
Rregullat e organizimit e të funksionimit të lojës, kategoritë e përfituesve, masa e përfitimit për çdo kategori dhe specifikime të tjera për këtë lojë rregullohen sipas legjislacionit në fuqi për lojërat e fatit.
Në lojë janë 511 shpërblime monetare për të gjithë konsumatorët. Të drejtën për të marrë pjesë në lojën e kuponit tatimor e ka çdo qytetar, i cili ka tërhequr gjatë periudhës së zhvillimit të lojës kupona tatimorë nga blerjet. Qytetari, që të kualifikohet si pjesëmarrës në lojë, duhet të ketë mbledhur jo më pak se 50 kupona tatimorë dhe me vlerë totale të të gjithë kuponave jo më të vogël se 5,000 lekë.
Kuponat e mbledhura brenda periudhës së zhvillimit të lojës promocionale duhet të postohen nëpërmjet shërbimit rekomande të Postës Shqiptare në adresën: “Për Lojën promocionale të kuponit tatimor; Shtypshkronja a Letrave me Vlerë (ish-topografia ushtarake), Tiranë”.
Përveç kuponave tatimorë, pjesëmarrësi duhet të vendosë në zarf një etiketë me të dhënat e tij, vetëdeklarimin e numrit të kuponave të vëna brenda në zarf dhe vlerën nominale në lekë të gjithë kuponave./Monitor
