Versione të ndryshme po qarkullojnë në lidhje me fatin e dy pilotëve të avionit rus të rrëzuar nga avionët e ushtrisë turke. Ata arritën të dalin nga avioni i përfshirë nga flakët me parashutë, por nuk është arritur asnjë kontakt.
Ndërkohë, terroristët e ISIS shpërndanë një video ku dukej një ushtar i vdekur me uniformë ruse, por nuk ka asnjë konfirmim nëse bëhet fjalë për njërin prej pilotëve të rrëzuar.
Sipas televizionit turk NTV, autoritetet e këtij vendi po bëjnë kërkime për gjetjen e tyre. Këto informacione janë siguruar nga burime të sigurisë së Turqisë.
Sipas të njëjtave burime, pilotët ndodhen aktualisht në duar të grupeve të panjohura të opozitës siriane, me të cilat autoritetet turke kanë hapur mundësitë për të kërkuar lirimin e tyre. “Nuk kemi asnjë informacion për fatin e dy pilotëve”, tha sot zëdhënësi i Kremlinit, Dmitri Peskov.
