Qeveria do të ndërtojë tri rrugë të reja, ku dy prej tyre do t’u jepen me koncesion kompanive private. Ministrisë së Transporteve i janë paraqitur dy propozime të pakërkuara për ndërtimin me koncesion të rrugës Vaqar-Kavajë dhe Milot-Balldrem, ndërsa do të nisë hartimi i projektit për Elbasan-Qukës. Zv.ministri i Transporteve, Artan Shkreli, tha dje në Komisionin e Ekonomisë se Ministria po shqyrton projektet me koncesion për ndërtimin e dy rrugëve.
“Për rrugën VaqarKavajë dhe Milot –Balldrem kanë ardhur propozimet në ministri dhe në këto momente janë duke u shqyrtuar studimet e fizibilitetit ku një pjesë e tyre duken mjaft të mira. Ky është motivi që janë hequr dy nga këto projekte për financim nga marrëveshja e huasë, sepse do të shikohen me kontrata me koncesion. Me këtë financim ka mbetur vetëm bypass-i i Elbasanit, siç duket nuk ka pasur interesim në këtë nivel”, u shpreh Shkreli.
Drejtori i Transportit në Ministrinë e Transportit dhe Energjetikës, Dhimio Plaku, tha se të dyja projektet e paraqitura janë autostrada me 4 korsi.
“Ofertën për propozim të pakërkuar, me partneritet publik privat e kemi për Milot-Balldrem dhe do të jetë autostradë, paralel me rrugën ekzistuese me katër korsi. Për Vaqar –Kavajë projekti është autostradë me katër korsi”,- tha Plaku. Kryetari i Komisionit të Ekonomisë, Erjon Braçe, kërkoi shpjegime për veçimin e autostradës Vaqar-Kavajë nga projekti ekzistues, Thumanë-Rrogozhinë.
“Ai konsiderohet një projekt nga Thumana në Rrogozhinë, nuk e kuptoj pse e keni copëtuar. Pse ky segment autostrade është i kufizuar nga Vaqari deri në Kavajë”, tha Braçe. Zv.ministri i Transporteve, Artan Shkreli, shpjegoi se kërkesat nga kompanitë private ishin më të larta për Vaqar-Kavajë, ndërsa Thumanë–Kashar është veçuar për shkak se është pjesë e projektit Adriotiko-Jonian.
“Shprehja e interesit nga Vaqari në Kavajë është më e lartë. Ndërsa hapja e segmentit të ri që shkon në Rrogozhinë ka më pak kërkesa dhe studimet e fizibilitetit janë më të gjata dhe më të ndërlikuara për ne për të bërë një përmbledhje”, tha Shkreli. Komisioni i Ekonomisë miratoi dje marrëveshjen e huasë së butë, me vlerë 30 milionë euro që do të përdoren për hartimin e projektit të rrugës Qukës-Elbasan, bypass-in e Elbasanit dhe bypass-in e Beratit.
“Kredia që po shqyrtojmë është një vendim që është marrë para shumë vitesh. Flitet për ndryshimin e studimit të fizibilitetit dhe të impaktit mjedisor në dy akse, nga Milot-Shkodër që ishte, ne do të bëjmë Elbasan-Qukës për të lehtësuar trafikun që është në këtë aks dhe një rrugë e papërshtatshme për transportin e mallrave, që vijnë nga dy doganat kryesore Kapshticë dhe Qafë– Thanë. Nga ana tjetër do të zëvendësojmë Vaqar-Kavajë me bypass-in e Beratit, i cili do të lehtësojë rrugën për Skrapar dhe Çorovodë dhe do të lemë siç ishte bypass-in e Elbasanit”, u shpreh zv.ministri Shkreli. /panorama
ma.me
