Qeveri e reeee! Qeveri e reeee!

Nga Dritan Shano

Rama u shpreh se javën tjetër do shpallim qeverinë e re. Ai ngushëlloi këdo që nuk do jetë në kabinetin e ri nga të vetët, por me sa duket i dha fund edhe pandehmës së bashkë-qeverisjes me PD.

Këtë pandehmë Rama e ngriti vetë gjatë fushatës për zgjedhjet e përgjithshme dhe e la të paprekur deri ditën e sotme. Me gjasë ideja e bashkëqeverisjes – aksesi në tepsi – mund t’i ketë shërbyer Ramës për të mpirë fushatën e demokratëve, dhe po ashtu t’i ketë shërbyer në proçeset vijuese Bashës, i projektuar në mendjen e demokratëve si mbajtës i garuzhdes së pushtetit në PD, përmes të cilit dhe ata pas 8 vjet opozitë do kishin akses në tepsi. Por këto mbeten edhe vetë pandehma të ngritura mbi pandehmën fillestare të Ramës. Të vërteta ose jo, sot ato kyçen në sirtar.

Nëse Rama e sheh Bashën si interlokutorin e vet të preferuar, në mungesë të konkretizmit bashkëqeverisjes, për t’i ruajtur këtij të fundit autoritetin, por edhe për të mos ta lënë të radikalizohet, mund të investojë tek ai duke i afruar datën e zgjedhjeve lokale, kështuqë Basha të mund të menaxhojë sadopak pushtet në një dyzinë bashkish.
Tani të vijmë tek qeveria e re.

Për ne shqiptarët e thjeshtë, kjo është si kinder “Sorpresa” përsa i përket kompozimit të saj emëror dhe gjinor, por nga ana tjetër është si kinder “Suor Presa” nga pikëpamja e financimit të PPP-ve dhe rritjes së borxhit publik, mbështetjes së ortakëve të pushtetit e kështu me rradhë.

Qeveria e re “Rama” si dhe ato të tjerat përpara saj, parësisht do synojë të duket mirë. Çdo gjë tjetër është sekondare, ose e papërfillshme fare.

Në kushtet kur Ramës i duhet të fillojë të prodhojë ndonjë rezultat të Reformës për Drejtësi dhe Hetuesi, asnjë anëtar qeverie, ministër apo zëvendës ministër nuk mund të ketë mundësinë më të vogël të thirret nga SPAK. Kjo do e bënte Ramën të dukej keq dhe kjo, siç e dimë nga dy mandatet e mëparshme, nuk mund të tolerohet.

Po ashtu, personazhet që do popullojnë kabinetin qeveritar nuk mund të jenë nga kontigjenti i cili mund të shpallet non-grata me valën e re që pritet në vjeshtë. Kjo do e bënte Ramën të mos kapitalizonte politikisht non-gratat aktual, por sidomos se do dukej keq, dhe kjo, siç e dimë nga dy mandatet e mëparshme, nuk mund të tolerohet.

Nëse në qeverinë e re të Ramës do ketë ministra nga qeveria e kaluar, atëhere këta e kanë kaluar vetting-un privat. Por edhe nëse ndodh që të keteë shpeëtuar ndonjeë syresh, do bëhte kurban në milisekond, për të vërtetuar qashtërsinë e çuarjes përpara të reformës në drejtësi, dhe sidomos për t’u dukur mirë.

Nëse ndonjë nga tashmë ish-ministrat nuk është kandidat për SPAK apo non-grata, dhe përsëri nuk është në Qeveri, atëhere diku Rama e ka marrë inat. Kam një këshillë të sinqertë për këta, pini një filxhan uthull. Me provë.
Suksese fare!