Nga Ervis Iljazaj
Sali Berisha ndryshe nga hera e parw ka vendosur të zbatojë vendimin e gjykatës dhe masën e dhënë ndaj tij, detyrim paraqitje. Nëse do ta bënte që në fillim, ai dhe partia e tij nuk do kishte humbur një vit nga aktiviteti politik. Nuk kuptohet se çfarë fitojë duke refuzuar të zbatonte vendimin e gjykatës, duke qenë se tani ndodhet në të njëjtën situatë. Gjatë periudhës së arrestit shtëpiak ai e ktheu shtëpinë e tij në një vend të tubimi politik, kryesisht duke sulmuar SPAK. Me sa duket, kë të gjë tani do ta bëjë përpara dyerve të SPAK dy herë në muaj.
Edhe sot, nuk munguan sulmet ndaj organit të drejtësisë duke e akuzuar si të kapur politikisht, organizatë kriminale apo epitete të tjera denigruese. Kjo është një retorikë politike që me të gjitha gjasat do të vazhdojë deri në zgjedhjet e ardhshme parlamentare. Madje, duket sikur qëllimi politik i Partisë Demokratike dhe Berishës është çmontimi i SPAK dhe jo largimi i Ramës. Sepse energjitë e harxhuara në këtë drejtim dhe për këtë synim janë të shumta dhe s’po e lejojnë opozitën të mendojë për gjë tjetër. Ky është një minus i madh në raport me kundërshtarin, që edhe në këtë drejtim, ka një qasje komplet ndryshe.
Edhe pse në publik pushteti dhe Edi Rama e mbron SPAK dhe pretendon madje që është “krijesa” e tij, nën rrogoz bënë të pamundur për t’ja vështirësuar punën. Sepse është e qartë që puna e SPAK dhe hetimet e tij, po e ekspozojnë qeverinë si një qeveri të korruptuar. Nëse qytetarët mendojnë sot se korrupsionin i kësaj qeverie është në nivele të larta, kjo është edhe falë punës së SPAK. Gjithsesi, në sytë e opinionit publik Partia Socialiste dhe Edi Rama duket sikur e mbrojnë drejtësinë dhe e mbështesin atë.
Dy qasje të ndryshme të palëve politike të Partisë Socialiste dhe Partisë Demokratike, ku njëra e konsideron organizatë kriminale dhe tjetra e mbështet, edhe pse asnjëra prej tyre nuk e do dhe do të bëjnë të pamundurën për ta çmontuar strukturën e posaçme kundër korrupsionit. Dhe këto dy qasje padyshim që do të gjykohen në 11 maj, në ditën e zgjedhjeve parlamentare. Ndër të tjera, qytetarët shqiptarë do t’i gjykojnë palët politike edhe për qasjen që kanë patur ato me drejtësinë e re dhe kryesisht SPAK.
Është e qartë që në shumicë qytetarët kërkojnë hetimin e niveleve të larta të pushtetit për korrupsionin duke qenë se korrupsioni ka qenë një nga plagët më të mëdha të tranzicionit tonë.
Nëse Berisha në qasjen dhe akuzat ndaj tij ndaj SPAK ka të drejtë apo jo, do të shqyrtohet nga qytetarët në 11 maj. Në fund, gjykata që do të japë verdiktin final është ajo e popullit, në kuptimin elektoral të tij. E vërteta është se deri më tani, nga të gjitha sondazhet, SPAK rezulton një institucion i besueshëm. Këto sondazhe do të vërtetohen në zgjedhjet e ardhshme nëse janë të vërteta apo jo. Sepse pro ose kundër SPAK, do të jetë një elementë i rëndësishëm për vendimin që do të kenë shqiptarët në zgjedhjet e 11 majit.
Fokusi kryesor i opozitës dhe i Partisë Demokratike kundër SPAK do të duket në 11 maj nëse është një strategji e duhur ose jo. Në 11 maj do të duket nëse qytetarët do të vlerësojnë strategjinë e Berishës që mbrohet nga drejtësia dhe e sulmon atë, apo Ramës që sakrifikon njerëzit e tij të afërt me qëllim marrjen e flamurit të njeriut që mbron drejtësinë.
