Sikurse ishte paralajmëruar prej ditësh, pasditen e kësaj të diele, Partia Demokratike zhvillon protestën e saj kombëtare të radhës para Kryeministrisë.
Kreu i PD, Sali Berisha mbërriti pak para orës 18:00 në selinë blu, i veshur sportiv. Pas një takimi rreth 40 minutash, Berisha nisi marshimin bashkë me protestuesit drejt Kryeministrisë. Tubimi i sotëm nuk nisi me fjalime, por me molotovë drejt godinave.
Pas Kryeministrisë, u sulmua me molotovë ministria e Brendshme, e Infrastrukturës dhe selia e PS, ndërsa u dogj edhe një makinë policie. Ndërkohë Policia e Shtetit u kundërpërgjigj me autobotë me ujë dhe gaz lotsjellës për të ndarë turmën.
Ndërkaq, protesta e opozitës vijon të jetë e tensionuar në Tiranë, ndërsa protestuesit kanë hedhur molotov edhe në drejtim të godinës së Partisë Socialiste.
Policia e Shtetit ka ndërhyrë duke përdorur autobotin me ujë, si dhe gaz lotsjellës për të shpërndarë protestuesit e mbledhur në zonë.
