Në Tepelenë po merr formë një nga projektet më të veçanta mjedisore dhe turistike në vend, Qendra Multifunksionale e Parkut Kombëtar të Vjosës, një hapësirë që, sipas kryeministrit Edi Rama, do të shndërrohet në “dritaren natyrore drejt lumit të fundit të egër në Europë”.
Rama ka publikuar një video në rrjetin social Facebook, ku shprehet se ky projekt synon të ndërthurë shkencën, edukimin dhe turizmin e qëndrueshëm.
“Në Tepelenë, po merr formë Qendra Multifunksionale e Parkut Kombëtar të Vjosës, një hapësirë e veçantë që do të kthehet në dritare natyrore drejt lumit të fundit të egër në Europë. Kjo qendër do të përfshijë ambiente për studiuesit dhe laboratorë kërkimorë, një muze natyror me informacion shkencor mbi biodiversitetin e Vjosës, hapësira rekreative për turistët dhe zona edukative për fëmijët e nxënësit si një projekt që bashkon shkencën, edukimin dhe turizmin e qëndrueshëm, duke e kthyer Parkun Kombëtar të Vjosës në një model unik të bashkëjetesës midis njeriut dhe natyrës.”, shkruan Rama.
Në këtë videomesazh, flet edhe ministri i Mjedisit Sofjan Jaupaj, i cili shprehet se kjo qendër është një vlerë e shtuar për gjithë zonën.
“Kjo luginë dhe kjo qendër, i bën shumë nder në fakt gjithë elementit të trashëgimisë natyrore dhe kulturore, që ka qarku i Gjirokastrës. Dhe në fakt është një xhevahir i shtuar në gjithë trajektoren e vizitueshmërisë që ka ky qark, përveç bukurive natyrore, bukurive të trashëgimisë kulturore, si kalaja etj, mund të ndalojnë dhe të vizitojnë edhe qendrën e Vjosës, që në të vërtet është një muze i hapur që mbledh bimët endemike, por në të vërtet përmbledh një arkiteturë moderne që reflekton arkitekturën natyrore të lumit vjosa.”, tha ministri i Mjedisit Sofjan Jaupaj.
Me përfundimin e Qendrës Multifunksionale, pritet që Tepelena dhe zona përreth të fitojnë një dimension të ri zhvillimi, duke u kthyer në një destinacion të rëndësishëm për ekoturizmin dhe kërkimin shkencor në Shqipëri.
