Partia Demokratike e Shqipërisë u përpoq të parandalojë reformën në drejtësi me një fushatë të egër kundër procesit të vetingut, raporton lexo.al.
Në këtë përfundim ka arritur Fondacioni Roberti Schuman në një analizë për situatën politike të vendeve të Ballkanit Perëndimor dhe perspektivën e tyre europiane.
Në raportin me titull “Ballkani perëndimor: midis stabilitetit dhe integrimit europian”, miratimi unanim në parlamentin shqiptar i amendamenteve kushtetuese që i hapën rrugën reformës në drejtësi, vlerësohet si një moment pozitiv, ndërsa vetingu i gjykatësve dhe prokurorëve si një proces historik që nisi me insistimin e partisë socialiste, shkruan lexo.al.
Sipas autorit Pierre Mirel, ish Drejtorit për Ballkanin Perëndimor në Drejtorinë për Zgjerimin të Komisionit Europian, anëtarë të vjetër të PD janë përpjekur të parandalojnë reformën, por procesi i vetingut nisi pas fitores së një shumice të qartë nga Partia Socialiste në zgjedhjet e Qershorit 2017.
“Anëtarët e vjetër të Partisë Demokratike u përpoqën për herë të fundit të parandalonin reformën në Shkurt 2017 me një fushatë të egër kundër vetingut të gjykatësve e prokurorëve dhe bojkotin e parlamentit, si dhe me kërkesën për një qeveri teknike deri në zgjedhjet e qershorit 2017. Një marrëveshje mes liderit të ri Lulzim basha dhe Kryeminsitrit Rama i dha fund bojkotit. Zgjedhjet çuan në një shumicë të qartë për PS dhe procesi i vetingut filloi. Ky proces ka për më tepër një mbështetje të gjerë publike”, shkruhet në raport, transmeton lexo.al.
Fondacioni Robert Schuman është qendra kryesore e kërkimeve dhe studimeve mbi politikat e Bashkimit Euopian, e vendosur në Paris dhe Bruksel./Lexo.al
