Operacioni policor i koduar “Qafë Plloça” ka vënë në pranga gjashtë persona, mes të cilëve njëra ishte femër që po transportonin 26 emigrantë të paligjshëm.
Dy të arrestuar janë identifikuar me inicialet N. B., 40 vjeç dhe R. H., 41 vjeç, banues në Tiranë, të cilët u kapën pranë vendit të quajtur “Kryqëzimi i Libonikut” në Maliq, duke transportuar në drejtim të Tiranës, me mjetin fugon tip “Volkswagen” dhe automjetin tip “Golf” 18 shtetas të huaj, emigrantë të paligjshëm.
Po gjatë operacionit u arrestuan edhe P. M., 27 vjeç e E. P., 23 vjeç, banues në Durrës, M. C., 35 vjeç, banues në Pukë dhe M. Sh., 25 vjeçe, banuese në Linzë, Tiranë, të cilët po transportonin me dy mjete tip “Volkswagen Golf” dhe një mjet tip “Benz” në drejtim të Tiranës, 8 shtetas të huaj, emigrantë të paligjshëm.
Shërbimet e Policisë iu kanë bërë me shenjë drejtuesve të mjeteve të ndalojnë, por katër prej tyre nuk iu bindën urdhrit dhe vijuan duke kryer manovra të rrezikshme.
Policia iu vu në ndjekje dhe i ndaloi në hyrje të qytetit të Pogradecit. Nga kontrolli i ushtruar rezultoi se shtetasja M. Sh. drejtonte njërin prej mjeteve tip “Volkswagen Golf” pa leje drejtimi.
Nga hetimet e kryera, rezulton se të arrestuarit bashkëpunonin me njëri-tjetrin dhe ushtronin aktivitetin kriminal të dhënies së ndihmës shtetasve të huaj, për kalim të paligjshëm të kufirit, duke iu premtuar atyre kalimin drejt vendeve të BE-së, kundrejt fitimit prej 300-350 euro secilit.
Në cilësinë e provës materiale u sekuestruan 5 mjete dhe 6 aparate celulare.
Materialet në ngarkim të tyre i kaluan Prokurorisë së Korçës, për veprat penale “Ndihma për kalim të paligjshëm të kufijve”, “Mosbindja ndaj urdhrit të punonjësit të policisë”, “Shkelja e rregullave të qarkullimit rrugor” të kryera në bashkëpunim dhe “Drejtimi i automjeteve në mënyrë të parregullt”.
/a.r
