Lionel Messi ka dalë para gjykatës sot në Barcelonë, ku është përballur me akuzat për evazion fiskal.
Ja disa pyetje kyç për të kuptuar se si u gjet në një situatë të tillë ylli i futbollit botëror.
Pse akuzohet?
Lojtari dhe babai i tij, Jorge Horacio Messi, akuzohen të dy për mashtrim të shtetit spanjoll, me taksa të papaguara në vlerën 4.16 milion euro, për periudhën 2007-2009.
Si është kryer mashtrimi financiar?
Sipas prokurorëve, Jorge Horacio Messi, ka ngritur një rrjet kompanish guackë për të fshehur të ardhurat nga shitja e imazhit të të birit.
Gjatë tre vjetëve në shqyrtim nga gjyakata, futbollisti argjentinas ka fituar 10.1 milion euro nga marrëveshjet e sponsorizimit me 20 kompani, përfshirë Adidas e Pepsi.
Por, asnjë taksë të ardhurash nuk është paguar për këto pará në Spanjë, vendi i rezidencës, pasi Mesi dhe i ati pretendojnë se ua kanë shitur të drejtat e imazhit kompanive në Uruguaj dhe Belize, për një çmim simbolik.
Paratë më pas kanë qarkulluar përmes Britanisë e Zvicrës pa u paguar asnjë taksë për to, ndërsa autoritetet fiskale spanjolle nuk kanë pasur asnjë ide se përfituesi real ishte Messi.
A mund të shpallet fajtor?
Askush, përfshirë edhe babë e bir, nuk e ka kundërshtuar akuzën dhe tashmë e kanë bërë një pagesë pesë milion euro në autoritetet financiare për të ndrequr gabimin. Ajo që pretendojnë Messi dhe avokati i tij është se lojtari nuk e ka pasur idenë se çfarë bëhej me të ardhurat e tij. “Unë nuk merrem kurrë me paratë. Me këto merret im’atë dhe unë i besoj atij”, deklaroi Messi që para se të shkonte në gjyq. Ylli i Barcelonës pretendon se nuk e di as se çfarë kontratash ka nënshkruar.
Çfarë ndëshkimi mund të marrë?
Shërbimi ligjor i shtetit, që përfaqëson interesat e zyrës së taksave në Spanjë, kërkon dënim me burg 22 muaj e 15 ditë, si dhe gjobë të barabartë me shumën e shmangur nga taksat.
Prokuroria nuk ka ngritur akuza për Messin, pasi beson se është babai fajtori i vetëm, si personi që ka menaxhuar çështjet financiare të lojtarit. Prokurorët publikë kërkojnë 18 muaj burg për Jorge Horacio Messin, ndërsa shërbimi ligjor i shtetit kërkon të njëjtin dënim si për të birin, 22 muaj e 15 ditë në burg.
Mund të shkojë Messi në burg?
Ky skenar është i pamendueshëm, pasi, edhe sikur lojtari të shpallet fajtor e të dënohet me burg, dënimet me më pak se dy vjet burg në Spanjë zakonisht jepen me kusht për shkelësit që nuk kanë shkelje të mëparshme.
A ka ndryshuar mënyrë veprimi Messi që kur ka nisur ky hetim?
Inspektorët e taksave e kanë marrë 20 herë në pyetje Messin midis viteve 2011 e 2013, kur më në fund vendosën ta raportonin çështjen në prokurori. Përveç 5 milionë eurove të paguara për çështjen që po gjykohet, Messi ka paguar 10 milionë euro për të mbuluar çdo evazion të mundshëm që mund të dalë për vitet 2010 e 2011. Ai deturohet të paguajë shumë sepse fiton shumë.
Sipas Messi ishte i katërti në listën e sportistëve që kishin fituar më shumë më 2015, 73.8 milionë dollarë, pas rivalit të tij të madh, Cristiano Ronaldo, fitues i 79.6 milionë dollarëve.
The Telegraph/JavaNews/D.Ikonomi