Presidenti i Rusisë, Vladimir Putin, dhe presidenti i Republikës Srpska të Bosnjës, Milorad Dodik, janë takuar të enjten në Moskë për të diskutuar për situatën në Ballkan, ka bërë të ditur Kremlini nëpërmjet një komunikate.
“Është diskutuar për situatën në Ballkan, si dhe për çështjet e ndryshme të bashkëpunimit bilateral. Palët kanë shkëmbyer mendime për çështjet relevante të agjendës ndërkombëtare”, thuhet në komunikatë.
Putin ka uruar që të shkojë mirë referendumi i së dielës në Republika Srpska, për caktimin e 9 janarit si Ditë të Republikës, që mund t’ia hapë Republika Srpskas rrugën drejt pavarësimit, ka bërë të ditur Dodik në një bisedë telefonike për RTS, transmeton Gazeta Express.
Republika Srpska është një prej dy entiteteve të Bosnjës dhe Hercegovinës – tjetra është Federata e Bosnjës dhe Hercegovinës.
Marrëdhëniet e tyre janë kryesisht të ndikuara nga lufta civile në mes të serbëve, myslimanëve të bosnjës dhe kroatëve gjatë viteve 1992-1995. (b.an)
