Kina dhe Bashkimi Evropian (BE) duhet të respektojnë interesat thelbësore dhe shqetësimet kryesore të njëri-tjetrit, të menaxhojnë siç duhet dallimet dhe mosmarrëveshjet, të thellojnë bashkëpunimin praktik dhe të bashkojnë përpjekjet për të përballuar sfidat globale, tha të premten Ministri i Jashtëm i Kinës Wang Yi gjatë një takimi trepalësh me homologun gjerman Johann Wadephul dhe atë francez Jean-Noel Barrot.
Wang e përshkroi takimin e parë trepalësh si një hap inovativ në përgjigje të rrethanave globale në zhvillim dhe një mundësi të rëndësishme për komunikim
Pesë dekada shkëmbimesh dhe bashkëpunimi kanë treguar se Kina dhe Evropa janë partnere dhe jo rivale, ndërvarësia nuk është rrezik, ndërthurja e interesave nuk është kërcënim dhe hapja e bashkëpunimit nuk do të dëmtojë sigurinë, tha ai.
Duke vënë në dukje se zhvillimi i Kinës është një mundësi për Evropën dhe sfidat e Evropës nuk vijnë nga Kina, Wang shprehu shpresën se Gjermania dhe Franca do të nisen nga interesat e veta dhe ato të përgjithshme të BE-së për të ndihmuar bllokun të nxisë një kuptim objektiv dhe të gjithanshëm ndaj Kinës, të ndjekë një politikë të arsyeshme dhe pragmatike ndaj Kinës dhe të qëndrojë e përkushtuar në përcaktimin e marrëdhënieve Kinë-Evropë si një partneritet.
Wadephul tha se në një botë të trazuar, Gjermania dhe Franca kanë nevojë për dialog dhe komunikim me Kinën më shumë se kurrë për të ndërtuar besim të ndërsjellë, për të zhdukur keqkuptimet, për të luajtur rolet e tyre si vende të mëdha, duke folur me një zë.
Gjermania i kushton rëndësi rolit pozitiv të Kinës në çështjet globale dhe është e gatshme të forcojë komunikimin dhe koordinimin me Kinën, tha ai, duke shtuar se Gjermania dhe Franca riafirmojnë angazhimin e tyre të vendosur ndaj politikës së “një Kine” dhe janë të përkushtuara për zhvillimin e marrëdhënieve afatgjata dhe të qëndrueshme me Kinën.
Wadephul tha se Gjermania mbështet tregtinë e lirë dhe kundërshton shkëputjen apo ndërprerjet në zinxhirët industrialë dhe të furnizimit, si dhe është e gatshme të punojë me Kinën për të zgjidhur mosmarrëveshje tregtare përmes konsultimeve dhe për të promovuar zhvillimin e ekuilibruar të marrëdhënieve ekonomiko-tregtare mes BE dhe Kinës.
Duke vënë në dukje paqëndrueshmërinë në rritje në botën e sotme, kërcënimet ndaj multilateralizmit dhe rendit ndërkombëtar si dhe konfliktet e zgjatura në rajone të ndryshme, Barrot tha se Franca, Kina dhe Gjermania duhet të punojnë së bashku për të promovuar paqen botërore .
Sa më i paqëndrueshëm bëhet peizazhi ndërkombëtar, aq më e nevojshme është të ndërtohen partneritetet, vuri në dukje ai, duke shtuar se Franca është e përkushtuar për të rigjallëruar marrëdhëniet e qëndrueshme dhe pozitive BE-Kinë.
Të tre palët shkëmbyen gjithashtu mendime mbi çështje të rëndësishme në marrëdhëniet Kinë-Evropë dhe mbi çështjet me preokupime të përbashkëta, si kriza e Ukrainës. Ata vlerësuan njëzëri takimin trepalësh dhe ranë dakord të ruajnë komunikimin strategjik.
Gjithashtu në takimin bilateral midis Wang dhe Wadepul , gjatë Konferencës së Sigurisisë në Munih , të dy përfaqësuesit ranë dakord se duhet të mbështesin me vendosmëri qëllimet dhe parimet e Kartës së OKB-së, të zëvendësojnë “ligjin e xhunglës” me qeverisjen globale dhe të punojnë së bashku për të shërbyer si një forcë stabilizuese në një botë të trazuar.
Bashkëpunimi ekonomiko-tregtar shërben si spirancë e marrëdhënieve Kinë-Gjermani, vuri në dukje Ministri Wang.
Wadephul tha se zhvillimi i qëndrueshëm i marrëdhënieve Gjermani-Kinë mund të sigurojë stabilitetin e domosdoshëm për një botë që karakterizohet nga paqëndrueshmëria dhe turbulencat.
