Dy punonjës të Policisë së Shtetit, jashtë orarit të shërbimit, kanë gjetur dhe kthyer një çantë me 1000 euro, dokumente personale dhe një telefon celular, duke u vlerësuar për veprimin e tyre edhe nga drejtori i Policisë Ilir Proda.
Bëhet fjalë për punonjësit Klejdin Lleshajn, efektiv i Qarkullimit Rrugor Lezhë, dhe Durim Xhakajn, efektiv i Qarkullimit Rrugor Shkodër, të cilët mbrëmjen e djeshme, rreth orës 22:30, në rrugën e Rinasit, teksa po ktheheshin me familjarët e tyre nga Tirana drejt Lezhës dhe Shkodrës, gjetën një çantë të humbur në rrugë.
Brenda saj ndodheshin dokumente identifikimi, 1000 euro dhe një celular, që i përkisnin një 34-vjeçari nga Kavaja, i kthyer nga Italia.
Nëpërmjet pasaportës dhe rrjeteve sociale, policët arritën të identifikojnë dhe të kontaktojnë pronarin, duke ia dorëzuar sendet e humbura.
Për këtë veprim, Drejtori i Përgjithshëm i Policisë së Shtetit, Ilir Proda, u ka dërguar një mesazh falënderimi, duke vlerësuar integritetin, humanizmin dhe përgjegjësinë e treguar prej tyre, edhe pse ishin jashtë shërbimit. Ai theksoi se ky veprim forcon besimin e qytetarëve tek Policia e Shtetit dhe nderon uniformën e saj.
