Ditë zie është shpallur në Kiev pasi sulmi i dytë më i madh ajror që prej fillimit të luftës shkaktoi të paktën 23 viktima, përfshirë 4 fëmijë. Kryebashkiaku i qytetit Vitali Klitschko, tha se po nderonin të vdekurit, teksa përpjekjet masive të kërkim-shpëtimit vijojnë pranë një pallati 5 katësh, ku u vranë 22 prej viktimave.
Sulmi gjeneroi kritika të ashpra ndërkombëtare, me kreun e shtëpisë së bardhë Donald Trump që tha se nuk ishte i lumtur, por as i befasuar, ndërsa Presidentja e Komisionit Europian Ursula Von der leyen, deklaroi se Rusia nuk do të ndalet nga asnjë, në terrorizimin e Ukrainës.
Ministrat e Mbrojtjes së BE takohen në Kopenaghë të Danimarkës për të diskutuar mbështetjen ushtarake për Kievin. Brukseli u shpreh veçanërisht i alarmuar për sulmin me raketa e dronë të Rusisë, pasi në të mbetën të dëmtuara edhe selitë e misionit të BE dhe Këshillit britanik në kryeqytetin ukrainas. Duke folur në prag të takimit të së premtes, ministrja e Mbrojtjes së Lituanisë tha se presidenti rus po blen kohë për të vrarë më shumë njerëz.
“Shpresat për negociata të mundshme paqeje janë naive kur shohim se çfarë po ndodh në Ukrainë, ku 23 persona u vranë në Kiev, e ku u bombarduan misionet diplomatike. Gjithçka bën Putini është zvarritja, blerja e lirë e kohës për të vrarë më shumë njerëz”, tha Dovile Sakaliene.
Ministri estonez i Mbrojtjes Hanno Pevkur tha se garancia më e mirë për Ukrainën do të ishte anëtarësimi në NATO.
Gjatë natës së fundit u raportuan më pak luftime, edhe pse si Rusia ashtu edhe Ukraina folën për dhjetëra dronë të rrëzuar.
Kreu rajonal i Harkivit, Oleh Syniehubov bëri të ditur se 5 vendbanime në rajonin e tij ishin sulmuar, me një të vrarë në Kupyansk. Presidenti Trump shpresoi të organizonte një takim mes Zelenskit dhe putin për ti dhënë fund luftës, por përpjekjet kanë ngecur.
