Shqipëria renditet ndër vendet me nivel të lartë të vdekshmërisë nga sëmundjet e zemrës, sipas të dhënave të fundit të Instat dhe Eurostat. Statistikat tregojnë se 52.9% e vdekjeve në vend lidhen me problemet kardiovaskulare, ndërsa në vendet e Bashkimit Europian kjo shifër është 32.8%, pra gati dy herë më e ulët.
E ftuar në studion e emisionit “Në Kohë Reale” në RTSH, mjekja kardiologe Engjëllushe Hasani tha se faktorët e stilit të jetesës po ndikojnë ndjeshëm.
Për të rinjtë nën moshën 40 vjeç, sipas mjekes, mungesa e aktivitetit fizik është një nga elementët kryesorë. Po ashtu ndikojnë edhe mbipesha dhe përdorimi i drogave.
“Të rinjtë, mosha nën 40 vjeç janë me risk minimal. Faktorë që ndikojnë janë mungesa e aktivitetit fizik. Gati 80% e të rinjve nuk bëjnë aktivitetin fizik të rekomanduar nga OBSH. Edhe mbipesha ndikon. Është shtuar sëfundimi edhe përdorimi i drogave që po ndikon goxha në zemër, gjithmonë flasim për moshën nën 40 vjeç. Nëse ndryshon stilin e jetesës, e minimizon rrezikun. Një nga elementët që ne ngulim këmbë dhe i themi pacientëve është që 80% e sëmundjeve kardiovaskulare parandalohen dhe këtu hy dieta e shëndetshme, aktiviteti fizik, marrja e duhur e medikamenteve për ata që janë me terapi”, u shpreh Hasani.
Një tjetër problem i evidentuar, sipas mjekes, është edhe mungesa e ndërgjegjësimit. Hasani thekson se shumë pacientë me çrregullime të yndyrave nuk e dinë që e kanë këtë problem, pasi nuk kryejnë analiza të rregullta.
“Ne kemi vënë re që të sëmurët që kanë çrregullime të yndyrave, vetëm gjysma e individëve e dinë që e kanë këtë problem. Nuk bëjnë analiza duke qenë që është një faktor rreziku që nuk jep dhimbje dhe këtu dalim te edukimi i ulët shëndetësor”, theksoi mjekja.
