Arben Bastriu, i verbër i grupit të dytë, nuk ka mundur ta ruajë vendin e punës në Qendrën Sociale Shkozë, edhe pse me shkollë të lartë dhe eksperiencë 10 vite në fushën e mbrojtjes sociale.
Prej disa ditësh, atij i është komunikuar nga drejtoresha e qendrës të mos paraqitet më në punë me argumentin se është i padisiplinuar në punë. Por vetë i verbëri ka një tjetër argument për arsyet e largimit nga puna, çka e lidh me faktin se ai i përket komunitetit rom dhe për më tepër është i verbër. Arbeni shkon dhe më tej duke akuzuar drejtoreshën e qendrës Kajame Sinani për racizëm të theksuar ndaj tij dhe komunitetit me ngjyrë, të cilit ai i përket.
Por sikundër dëshmon Arbeni shkaku kryesor i largimit të tij nga puna lidhet me vdekjen e foshnjës në barakat e Shkozës një muaj më parë, rast të cilin e ka asistuar menjëherë si dhe ka ndihmuar familjen e varfër rome me të holla për ta varrosur fëmijën, por fill pas kësaj vetëm një ditë më pas i është komunikuar shkarkimi nga detyra e punonjësit social.
Debati për heqjen e personit të verbër nga puna ka mbërritur deri tek institucioni i Avokatit të Popullit, i cili pas kontaktit me drejtoreshën e qendrës sociale Kajame Sinani i ka kërkuar kësaj të fundit që të mos largojë nga puna Arbenin duke i kujtuar edhe ligjin që mbron kategori të tilla të margjinalizuara sikundër janë te verbrit dhe romët.
Arbeni thotë se ngjarjen nuk do ta lërë me kaq dhe se kallëzimin e tij për drejtoreshën do ta dërgojë deri në Strazburg.
Ndërkohë vetë drejtoresha e Qendrës Sociale Shkozë, Kajame Sinani, nuk ka pranuar të sqarojë për News 24 arsyet e largimit nga puna të punonjësit të saj të verbër.
BW
