Ana tjetër e krizës. Hotelet dhe studiot në destinacione të njohura turistike greke i gjen shumë lirë. Rezervimi mund të bëhet pa kartë krediti dhe anulimi është pa kosto, pagesa bëhet në momentin e mbërritjes….
Kriza e borxheve në Greqi dhe pasiguria nëse vendi do të arrijë të rezistojë në euro, që po ndodh në kulmin e sezonit, ka sjellë një rënie të ndjeshme të çmimeve të hoteleve e apartamenteve, ndërsa mund të rezervosh pa pasur nevojë për kartë krediti.
Me cash me vete (që shqiptarët nuk e kanë aspak problem, ndryshe nga europianët) mund të kalosh pushime në vendin që po trondit themelet e monedhës së përbashkët. Kemi bërë një kërkim të thjeshtë në booking.com për disa destinacione të njohura turistike në Greqi, për 10 netë (mbërritja në 1 gusht dhe largimi në 11 gusht) për dy persona. Çmimet e hotelit për dy persona për një qëndrim prej 10 netësh, në kulmin e sezonit nga data 1 deri në 11 gusht fillojnë nga 300 euro në Korfuz, ndërsa me 400-500 euro mund të gjesh apartamente apo dhoma pa fund në Pargë, Kalkidiki etj.
Hotelet i kanë thjeshtuar ndjeshëm procedurat e prenotimit, sidomos pas mbylljes së bankave, që tashmë nuk dihet se kur do të hapen. Pothuajse të gjitha hotelet të njoftojnë me gërma të dukshme se rezervimi është i mundur pa kartë krediti, anulimi është falas dhe mund të paguash më vonë, ndërsa konfirmimi është i menjëhershëm.
Mjafton të japësh të dhënat (emrin, mbiemrin) dhe një email dhe rezervimi kryhet në çast, ndërsa anulimi është falas (të konfirmuara këto dhe nga një provë e kryer). Të gjitha ofertat të japin mundësinë që të prenotosh në çast dhe të paguash në momentin e mbërritjes. Nëse kërkimi kryhet për në shtator në datat 1 deri 11 shtator, po për dy persona, ofertat janë pa fund sërish dhe shumë më të lira, ato fillojnë nga 150 euro në Korfuz e 200 euro në Kalkidi e Pargë.
Monitor
