Vijon puna për rijetëzimin e Piramidës së Tiranës. Kryeministri Edi Rama ka publikuar pamjet nga punimet që po kryhen në kantierin e Piramidës, ndërsa deklaron se së shpejti do të jetë gati qendra më e madhe e teknologjisë digjitale në Ballkan.
“MIRËMËNGJES dhe me punën e përditshme në kantierin e Piramidës së Tiranës, e cila së shpejti do të jetë gati për qendrën më të madhe të teknologjisë digjitale në Ballkan, ju uroj një javë të mbarë”, shkruan Rama në rrjetin social Facebook.
Në nisje të projektit, Kryeministri Rama është shprehur se rijetëzimi i Piramidës është një projekt transformimi arkitektonik i studios së famshme holandeze MVRDV, që do krijojë kushtet optimale për Qendrën më të madhe Digjitale në rajon.
Rama ka theksuar se “Projekti i plotëson të gjitha ato kushte që çdo projekt duhet të plotësojë për t’i qëndruar kohës, për t’i shërbyer njerëzve e për t’i ndihmuar të gjithë që të mos harrojnë se nga vijnë. Kjo godinë e krijuar për të mistifikuar figurën e Enver Hoxhës dhe kohën e një diktature brutale, sot bëhet gati t’i shërbejë ekzaktësisht ekstremit të kundërt me të gjithë atë që përfaqësonte ai sistem dhe me të gjithë atë që donte Enver Hoxha, – duke i dhënë të rinjve lirinë e pakufishme të sfidimit të vetvetes dhe të kërkimit të të ardhmes në një botë që është e gjitha për t’u zbuluar, pavarësisht se edhe kështu siç është, duket se ka shkuar përtej çdo kufiri të imagjinatës, universin dixhital”.
/a.r
