Gjykata e Posaçme e Kosovës, me seli në Hagë, shpalli fajtorë dy ish-drejtuesit e Organizatës së Veteranëve të Ushtrisë Çlirimtare të Kosovës (UÇK), Hysni Gucati dhe Nasim Haradinaj, dhe i dënoi me nga katër vjet e gjysmë heqje lirie, nën akuzat “për pengim të personave zyrtarë në kryerjen e detyrave zyrtare, frikësim të dëshmitarëve dhe shkelje të fshehtësisë së procedurës”.
Të dy ata arrestuan më 25 shtator të vitit 2020 dhe në dënimin e tyre llogaritet edhe koha e qëndrimit në paraburgim. Akuzat u ngritën pasi Organizata e Veteranëve të Luftës tha në shtator të vitit 2020, se kishte marrë nga persona të panjohur mijëra dosje të Gjykatës së Posaçme, që dëshmojnë për bashkëpunim të saj me autoritetet e Beogradit dhe për, siç thuhet, karakterin e saj të njëanshëm.
Prokuroria e Specializuar tha se “Hysni Gucati dhe Nasim Haradinaj u organizuan në bashkërendim për shpërndarjen e paautorizuar të informacionit të besueshëm dhe jo publik, duke organizuar dhe duke marr pjesë në konferencat për shtyp dhe paraqitje publike, ku informacioni i besueshëm dhe jo publik është përhapur dhe diskutuar publikisht”.
Prokuroria tha se me këto veprime, Hysni Gucati dhe Nasim Haradinaj kanë shkelur fshehtësinë e procedurës dhe frikësuar dëshmitarët e Zyrës së Prokurorit të Specializuar dhe si rrjedhojë, penguan punën dhe hetimet e kësaj prokurorie.
Gucati dhe Haradinaj kanë hedhur poshtë vazhdimisht akuzat./m.j
