Deputetja e Partisë Socialiste, Vasilika Hysi u shpreh sot lidhur me vendimin e Prokurorisë, për ndalimin e publikimit të përgjimeve nga ana e medieve.
Në një intervistë televizive Hysi tha se “do doja të bënim një dallim, sa i përket rolit që ka media dhe rolit që luajnë institucionet e drejtësisë, sidomos organi i Prokurorisë. Padyshim që ju të medias, do gërmoni të gjeni lajmin dhe kjo është puna juaj, ndryshe ju nuk mund të bëni misionin tuaj. Unë nuk kam asnjë koment në lidhje me publikimin që ka bërë gazeta gjermane, nuk kam pasur mundësi ta lexoj për shkak të një angazhimi që kam pasur gjatë ditës së djeshme, por të paktën si juriste mund t’ju them që organi i prokurorisë ka një përgjegjësi shumë të madhe. E para, mbi të gjitha duhet të ndajë përgjegjësinë për hetimin e një çështje, që është në proces dhe e dyta, hetimin e përgjegjësve të atyre që kanë nxjerrë ato që ne themi dokumentet e përgjimit”.
“E them këtë, – theksoi Hysi, – në radhë të parë për çështjet që janë në proces. Këto janë çështje të rëndësishme dhe sensitive, dhe kur ka çështje sensitive, shpejtësia e hetimit duhet të jetë më e madhe. Ka afate të hetimit, por në raste kur ka sensibilitet shkakton një presion, ka një interes të publikut, por çështje të tilla shpesh mund të bëhen shkak për konflikte”.
“Edhe konfliktin e fundit duhet që Prokuroria ta kishte hetuar dhe ta hetojë sa më shpejt. Nëse dalin përgjegjësit, dhe padyshim që në atë dosje ka përgjegjës, këta të hetohen nga Prokuroria dhe të dërgohen në Gjykatë, më pas gjykohen nga Gjykata. Sepse duhet të bëjmë një dallim, Prokuroria heton, por fajësinë apo pafajësinë e jep Gjykata”, – u shpreh Hysi.
/a.rada
