Ministria e Mbrojtjes e Tajvanit ka bërë të ditur të shtunën se ka zbuluar 16 avionë luftarakë kinezë që kanë operuar pranë ishullit një ditë më parë, pothuajse në të njëjtën kohë kur presidenti i Kinës po takohej me një lidere të opozitës tajvaneze.
Të premten paradite, presidenti kinez Xi Jinping u takua në Pekin me Cheng Li-wun, kryetaren e partisë më të madhe opozitare të Tajvanit, Kuomintang (KMT). Gjatë takimit, Xi deklaroi se Kina “nuk do të tolerojë absolutisht” pavarësinë e Tajvanit, të cilin Pekini e konsideron pjesë të territorit të vet.
Nga ana tjetër, Cheng e ka paraqitur vizitën e saj si një mision pajtimi për të ulur tensionet, duke i thënë Xi-t se pret që KMT dhe Partia Komuniste e Kinës të avancojnë “institucionalizimin” e paqes në ngushticën e Tajvanit.
Sipas raportit ditor të Ministrisë së Mbrojtjes së Tajvanit për aktivitetin ushtarak kinez në 24 orët e fundit, 16 avionë ushtarakë kinezë kanë fluturuar pranë ishullit nga mesi i mëngjesit deri në mesditë të së premtes. Takimi mes Xi dhe Cheng është zhvilluar në orën 11:00.
Zëvendësministri i Këshillit për Çështjet e Kinës në Tajvan, Shen Yu-chung, ka deklaruar në Taipei se përdorimi i presionit ushtarak ndaj Tajvanit si mjet për negociata politike ka qenë gjithmonë një taktikë e zakonshme e Kinës. “Nga njëra anë shohim mesazhe paqeje, ndërsa nga ana tjetër vazhdon presioni ushtarak pa ndërprerje,” tha ai.
Zyra e Çështjeve të Tajvanit në Kinë nuk ka dhënë përgjigje për kërkesat për koment.
Në Pekin, nënkryetari i KMT-së, Chang Jung-kung, tha se çelësi i paqes është t’u ofrohet qytetarëve të Tajvanit zgjedhja midis paqes dhe pajtimit ose luftës. Sipas tij, angazhimi me Kinën sjell “paqe me dinjitet”, jo nënshtrim.
Nga ana tjetër, zyra e presidentit tajvanez Lai Ching-te reagoi duke thënë se takimi Xi–Cheng synon të theksojë idenë se “Tajvani është pjesë e Republikës Popullore të Kinës” dhe të nxisë “aneksimin e Tajvanit”. Zëdhënësja Karen Kuo theksoi se “e ardhmja e Tajvanit mund të vendoset vetëm nga vetë populli tajvanez”.
