Këtë Kurban Bajram besimtarët myslimanët shqiptarë e kanë drejtuar vëmendjen te lufta në Gaza. Në studion e Dita Jonë në A2 CNN ish-myftiu i Tiranës Ylli Gurra dhe Entela Hidri kanë shprehur indinjatën e tyre për heshtjen e Komunitetit Mysliman Shqiptar, por edhe të botës.
“Të gjithë keni ndjerë makabritetin që ndodh para syve tanë dhe gjithë botës, sidomos me fëmijët që nuk gëzojnë dot 24 orë nga lindja e tyre, në djepat e krahët e nënave, apo djegiet në spitale, apo objektet e kultit në kisha e xhamia apo dhe gjatë shpërndarjes së ndihmave. Shpreh indinjatën me apatinë dhe mosreagimin minimal njerëzor të vetë institucionit të Komunitetit Mysliman të Shqipërisë, para asaj që po ndodh, që është një Reçak i përditshëm, atje ndodh përditë e çdo orë. Dhe apatia e pamundësia e një mosreagimi minimal të komunitetit është si mali që nuk bëzan. Ajo që më vret, është heshtja e institucionit fetar, duhet të solidarizohej përmes lutjeve. Arma më e fuqishme është të flasësh i lirë, por në kohën e vendin ku duhet”, tha ish-myftiu Gurra.
Ndërkohë besimtarja Entela Hidri ngriti akuza të forta ndaj këtij komuniteti, që sipas saj nuk përfaqëson besimtarët myslimanët të Shqipërisë.
“Papa Françesku ka dalë me deklaratë, ku shprehu çfarë po ndodh në Palestinë dhe kemi një KMSH që nuk i shërben popullsisë myslimane dhe neve që besojmë në këtë fe. Distancohem nga të gjitha veprimet dhe aktet që ata marrin, se kur na duhen nuk janë. Unë kam refuzuar të anëtarësohem në KMSH se nuk më përfaqëson. Ku do ta çojnë ndërgjegjen?”, tha ajo,
Ndërsa sa i përket qeverisë shqiptare ata shprehen se reagimet e tyre diktohen nga politika ndërkombëtare apo të rreshtuara me vendet e unionit duke tejkaluar ndjeshmërinë njerëzore.
“Në raport me qeverinë tejkalon ndjeshmërinë. Qeveritë janë përpara marrëveshjeje e bashkëpunimeve që tejkalojnë konfliktin dhe brendinë e vërtetë të përplasjeve të tilla, por janë të detyruara apo imponuara në raport të një rreshtimi të unionit. Fjala e BE është deri diku edhe e qeverisë”, tha Gurra.
Ndërsa Hidri i bëri thirrje botës që të reagojë ndaj gjenocidit në Gaza që sipas saj nuk ka të bëjë me besimin por me njerëzoren.
“Nuk ka nevojë të jesh besimtar për të qenë njerëzor dhe për të parë makabritetin që po ndodh. Ajo që më habit sesi një popull që ka përjetuar gjenocid të bëjë gjenocid. Bota çfarë po bën. Heshtja e botës kujt i shërben? Kujt po i shërben kjo se popujve nuk i shërben popujt duan që kjo luftë të mbarojë ne shohim protesta në mbarë botën. Fakti që aty vazhdojnë krimet makabre ata janë shprehur se do ekzekutojnë edhe palestinezin e fundit. Bëjmë thirrje që të jenë njerëzor përtej qeverisjes”.
