Kreu i PD Sali Berisha ka deklaruar se kontrata me drejtuesin e fushatës së PD Chris LaCivita do bëhet publike, ashtu siç edhe parashikohet nga legjislacioni shqiptar.
Në një konferencë për shtyp nga selia blu, Berisha shtoi se bashkë me kontratën do të bëhet transparencë për çdo qindarkë dhe burimin nga është marrë, për pagimin e La Civita.
“Ju garantoj se ajo kontratë, me të gjitha burimet se ku është marrë çdo qindarkë, do bëhet publike ditën që do përmbushet detyrimi ligjor i dorëzimit të saj në KQZ, siç na detyron ligji”, u shpreh ai.
Berisha u ndal edhe në komunikimet që kryeministri Edi Rama bën në rrjetet sociale me qytetarët duke iu përgjigju komentuesve në rubrikën “Sy m’sy”, ku u shpreh se pyetjet Rama ia bën vetë vetes duke mashtruar kështu qytetarët.
“Unë, natyrisht nuk bëj Edi Ramën që flet me vete, që shpik edhe fansat dhe i bën pyetje vetes duke mashtruar publikun se mora këto pyetje, në një kohë kur ato pyetje i nxjerr nga defteret e veta.
Kështu që unë nuk kam si të mos i përgjigjem pyetjes tuaj, ndonëse do preferoja shumë që pyetjet tuaja të përqendroheshin tek problemet e mëdha të shëndetësisë tonë dhe programin që ne paraqesim këtu.
Sepse siç e konstatoni, në krahun tjetër, Edi Rama ka mashtruar aq shumë, sa më ngjet me njeriun që është stërngopur me mashtrimet e tij dhe tani nuk ka guxim të nxjerrë më mashtrime të tjera dhe tani nuk ka më guxim të nxjerrë mashtrime të tjera dhe nga mëngjesi gjer në darkë shndërrohet në një banor të parkut zoologjik të avertebrorëve, të zhabave, zhapikëve, reptilëve, etj, etj, dhe nuk flet një fjalë për përgjegjësitë që ka para qytetarëve qoftë në ato që ka bërë, qoftë për ato që do bëjë. Po unë nuk jam ai. Unë do përgjigjem”, tha Berisha.
